Erasoak ez direla modu isolatuan ulertu behar esan du mugimendu feministak, "jendartearen antolaketa sexistak ahalbidetzen duen indarkeriaren ondorio dira".
Astelehenean Lezon izandako sexu erasoa salatu dute hamarnaka lagunek.
Nahikoa dela, eraso sexista gehiagorik ez dutela onartuko. Oihu isil horrekin bat egin dute gaur arratsaldean hamarnaka eta hamarnaka lagunek, Niessen merkatalgunearen aurrean Oreretako Mugimendu Feministak deitua zuen elkarretaratzean. Eremu horretan egin izan dituzten elkarretaratzeen artetik, jendetsuena izan da gaurkoa ziurrenik eta herritarrekin batera, alderdi politikoetako ordezkariek ere esan dute nahikoa dela.
Astelehen goizaldean Lezon eraso zuten Errenteriako emakumeari elkartasun eta babes osoa adierazi diote bildutakoek, baita haren senideei ere. Nabarmendu dute salatutako azken erasoa hori izan bada ere, azken egunetan beste sei genero indarkeria kasuren berri izan dela Euskal herrian.
“Asteleheneko bortxaketa, ez da isolatutako gertaera, ez da zoro batekin topo egitearen zorte txarraren ondorioa. Emakumeen aurkako biolentzia patriarkatuak ezarritako paperen parte da. Horregatik, indarkeria sexistak lehen mailako arazo sozial, politiko, ekonomiko eta kulturala izaten jarraitzen du”.
Erasoak ez direla modu isolatu edo bakartuan ulertu behar ere esan du mugimendu feministak, “jendartearen antolaketa sexistak ahalbidetzen eta sustatzen duen indarkeriaren ondorio moduan hartu behar ditugu”.
Emakume bat erasotzean, guztiak erasotuak
Emakume bat erasotzerakoan, guztiak erasotuak direla nabarmendu dute, bestalde, mugimendu feministaren ordezkariek, “horregatik gaude gaur berriz ere hemen. Ezinbestekoa zaigulako emakumeoi elkartzea, elkarrekin indartzea, autodefentsa feminista lantzea, ahalduntzea, pertsonalki zein kolektiboki, bizi garen sistema patriarkalak egunero jartzen dizkigun ataken aurrean salto egiteko eta indarkeria mota anitzei aurre egiteko”.
Edozein erasoren aurrean erantzuteko prest azaldu dira, gainera, eta herritarrak bat egitera deitu dituzte: “Ez dugu ez Oreretan ez inon eraso sexistarik onartuko, eta indarkeria sexistari autodefentsa feministaz erantzungo diogu, emakumeon bizitzak axola zaizkigulako”.
