Txalo zaparrada artean hartu dituzte Arnaldo Otegi, Maddalen Iriarte eta Julen Mendoza EH Bilduren ekitaldian bildutako hamarnaka eta hamarnaka herritarrek.
Jendetza bildu da EH Bilduren ekitaldi nagusian.
Bilgunea inauguratu du EH Bilduk gaur arratsaldean. Alkartetxea zena, moldatuta zabaldu dute, eta hamarnaka jarraitzaile bildu dira bertan brindisa egitera. Koalizio subiranistatik, gaurkoa, eskertza ekitaldia izan dela esan dute, “eskertza bertan bildu zaretenoi, eta falta diren beste askori ere”. Brindisa eginda amaitu dute inaugurazioa.
Ondoren Errenteria-Oreretako ekitaldi nagusia egin dute Arnaldo Otegi, Maddalen Iriarte eta Julen Mendozarekin. Agirre Lehendakariaren plazan egin dute ekitaldia eta bertara Errenteria-Oreretako eta Oarsoaldeko gainontzeko udalerrietako hamarnaka eta hamarnaka herritar bildu dira. Karpa zuten ekitaldirako, baina txiki utzi dute bertaratutako guztiek. Txaloka hartu dituzte Otegi, Iriarte, Mendoza eta beraiekin batera izan diren beste hautagaiak.
Errenteria-Orereta harro egoteko moduko herria dela esan du Iriartek, “urte hauetan guztietan egin duzuen elkarbizitza ariketagatik, Euskal Herriari erakutsi diozuen bideagatik”. EH Bilduk Euskal herria Europako beste herri batzuen mailara eramateko proiektua duela gaineratu du, “horretarako estatua izan behar dugu, tresnak behar ditugulako”.
Oarsoaldeaz ere mintzatu da. Ahaztutako eskualdea izan dela esan du, “abandonatuak sentitu zaretela esan izan duzue eta arrazoirik ez zaizue falta. Inongo gobernurik ez dizue jaramonik egin eta ez da saiatu urteetan bizi izan duzuen egoera iraultzen. Oarsoaldeak ekintzailetasuna eta elkartasuna erakutsi du hala ere, eta apustu sendoa egin behar dugu instituzioetatik zuek eta zuen inguru honek aurrera egin dezan. Euskal Herriak ezingo baitu aurrera egin eskualde honek ez badu aurrera egiten”.
Horren harira Pasaia eta Lekuona dantzagunea aipatu ditu eta esan du dena emango duela EH Bilduk, “hankak, eskuak, burua, bihotza, azala eta hezurrak emango ditugu Orereta, Pasaia, Lezo eta Oiartzunek Gasteizen zuen ahotsa izan dezazuen”.
Otegi hitz egiten ekitaldian.
Otegik lehenik eta behin, euskal presoen senideei zuzendu dizkie bere hitzak, “bidaiatzen bere bizitza ematen duten guztientzat”. Aitzol Gogorzari aipamen berezia egin dio ondoren, gaixotasun larri eta sendezina duten euskal preso guztiei bezala.
“Oreretak erakutsi du, etorkizuna ezberdina nahi badugu gauzak ezberdin egin daitezkela. Batzuk elkarbizitzaz asko hitz egiten dute, beste batzuk elkarbizitza eraiki egiten dugu. Oreretak erakutsi du besteen sufrikarioa entzun eta errespetatzea posible dela, baina baita ere sufrikario bakarra ez dela egon, pluralean egon direla”.
Elkarrizketa eraikitzailea egin duela Errenteria-Oreretak eta errelato bakarra ezin dela eraiki frogatu duela gaineratu du Otegik, “hemen errelatoak daudela frogatu duzue eta ezin direla inposizioan, umiliazioan, eta renuntzia politikoan planteatu, akatsa delako”.
