Dena prest da Pasaian Albaolarantz datozen gurdiei harrera egiteko

12:00ak inguru iritsiko da espedizioa Pasaiara, eta Euskadi etorbidea zeharkatuta ontziolarantz abiatuko dira; trafikoa eten egingo dute ordubete inguru.

olatz mitxelena

Pasaia

2016/09/16

Donostiatik Pasaiara bihar abiatuko dira gurdiak, 08:00etan.

Basoak atzean utzita, pixkanaka itsasertzera hurbiltzen doaz Albaolara bidean datozen hiru gurdiak. Leitzarandik sartu ziren atzo Gipuzkoara, eta gaur goizean irten dira Andoaindik Astigarragara bidean. Pasaiara bihar eguerdian iritsiko dira, Donostia zeharkatu ondoren. Gurdien etorrerak trafiko aldaketak eragingo dituela iragarri du udalak. Trintxerpe eta San Pedro barrutietako hainbat lekutan trafikoa itxiko dute 12:00etatik aurrera eta harrera ekitaldia bukatu bitartean. Ordu beteko iraupena aurreikusi dute gurdiak Euskadi etorbidetik sartzen direnetik Ondartxoko Albaola Faktoriara iritsi arte. Honenbestez, Euskadi etorbidea bi norabideetan itxiko dute 12:00etatik aurrera, eta gurdien karabanak aurrera egiten duen heinean, baita Esnabide eta Arraunlari kaleak ere. Gainera, Torreko plazan eta Torreatzen ezingo dira kotxeak aparkatu bihar eta etzi “idiek tiratutako gurdiak segurtasunez pasa daitezen”. Udalak “trafikoa lehenbailehen berrezartzen” saiatuko dela agindu du, “Donostia 2016 Europar Hiriburutzak eta Albaolak babestutako ekitaldi honek ahalik eta eragin gutxien izan dezan autoen trafikoan”. Informazio gehiago behar izanez gero, Udaltzaingora deitzeko eskatu du udalak, 943004300 telefono zenbakira.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.