Atlantikaldiaren hirugarren ekitaldia indartsu dator, jaialdia egonkortzeko asmoz. Aurreko edizioetan bezala goi mailako musika eskaintza antolatu dute, eta horrekin batera hamaika ekintza publiko zabalari begira.
Isabel Mancebo Baldaren ilustrazioa.
Atlantikaldiak kultur topagune eta musika jaialdi bihurtuko du Errenteria-Orereta hirugarrenez. Hilaren 22tik 25era ospatuko den festak aniztasuna izango du ardatz, eta antolatuko dituzten jarduera guztiek izango dute anitzetik zerbait: hizkuntza, jatorria, estiloa, nahasketa, adina, eskaintza…
Edizio hau «jaialdia egonkortzeko» asmoz datorrela esan dute antolatzaileek: «Urrats bat gehiago egitera goaz. Aurreko bi ekitaldiek Errenteria Atlantikoan kokatzeko balio izan digute, hirugarren ediziotik aurrera, mundu osora zabaltzeko asmoa daukagu». Irekiera ekitaldia hilaren 22an, 18:00etan, izango da Tosta Herrixkan, Zumardian.
Aurrekoetan bezala, «herritarrek eta herritarrentzat» egindako jaialdia izaten jarraituko du Atlantikaldiak. Horren harira, eragile eta norbanakoen proposamenak jaso dituzte antolatzaileek egitaraua osatzeko. Jaialdiaren barruan erakusketek, gastronomiak, hitzaldiek, tailerrek, proiekzioek, dantzak eta literaturak ere izango dute tartea, baina musika emanaldiak izango dira zalantzarik gabe izarrak hirugarren aldi honetan ere.
Luxuzko kartela
Atlantikaldian «kontzertu esklusiboak» izango dira. Luxuzko kartela osatu dute horretarako, eta Agirre Lehendakariaren plazan kokatuko duten agertoki nagusitik pasatuko dira Kepa Junkera eta Sorginak, Chet Nuneta (Frantzia), Tosta Banda eta Sophie Stephenson (Eskozia, Gales, Frisia, Irlanda, Kornualles, Galiza, Euskal Herria), Goran Bregovic (Bosnia eta Herzegovina), Terrakota (Portugal) Bad Sound System, eta Chambao (Andaluzia). Kontzertuak doan dira.
Musika arloan aniztasuna bilatu badute, beste hainbeste egin dute gastronomiarekin. Pintxo ibilbidea antolatu dute hamalau tabernak, eta Atlantikaldiko menuak emango dituzte herriko lau jatetxetan.
Sei elkarte gastronomikok Sukaldian gastronomia tailerra egingo dute hilaren 24an, larunbata, eta herrailde ezberdinetako gastronomia dastatzeko aukera izango da bertan.
Musika emanaldiak
- Osteguna, 22. Craobh Abhainn, Tosta Eszenan, 19:15ean; Kepa Junkera eta Sorginak & Chet Nuneta, Agirre Lehendakariaren plazan, 20:00etan.
- Ostirala, 23. Boujalal, Tosta Eszenan, 18:30ean; Tosta Banda & Sophie Stephenson, Agirre Lehendakariaren plazan, 20:00etan; Basquextrem, Tosta Eszenan, 21:30ean; Goran Bregovic, Agirre Lehendakariaren plazan, 22:30ean.
- Larunbata, 24. Ó Fearghail Brothers, Xabier Olaskoaga plazan, 12:00etan; Marit & Rona, Tosta Herrixkan, 13:00etan; Bec&Jen, Tosta Eszenan, 13:30ean; Eskusoinu bidaiaria, Foru plazan, 17:00etan; GWilym Bowen Rhys & Elidyr Glyn, Tosta Eszenan, 19:15ean; Terrakota & Band Sound System, Agirre Lehendakariaren plazan, 20:00etan; Iker Lauroba, Tosta Eszenan, 21:30ean; Chambao, Agirre Lehendakariaren plazan, 22:30ean.
- Igandea, 25. Marit & Pa, Tosta Herrixkan, 11:00etan; Monica de Nut & Luis Martins, Tosta Herrixkan, 11:45ean.
