Udal Ludoteka eta Gaztelekuak, zabaltzear
Errenteriako Udal Ludoteka zein Gaztelekuek gaur eta bihar irekiko dituzte ateak, hurrenez hurren. Izena emateko aukera zabalik eta urte guztiko aisialdia eskaintzarekin.
6-18 urte bitartekoentzat aisialdi eskaintza zabaldu du Errenteriako Udalak aurten ere. Gaurtik aurrera, hilak 20, zabalik egongo dira sei Udal Ludotekak eta bihartik aurrera, hilak 21, bi Gaztelekuak irekiko dira.
Haur eta nerabeentzako aisialdi eskaintza egiten du Errenteriako Udalak ludoteka eta gaztelekuen bitartez: “Hezkuntza ez formala indartu eta garapen sozio-afektiboa bultzatzea dugu helburu”, diote. 15 hezitzailez osaturiko lantaldea bilduko da aurten “balore hezitzaileak eta haurren parte-hartze aktiboa” bultzatu nahi dituzten ekimen hauetan.
6-12 urte bitartekoek Ludotekan eman ahal izango dute izena gaurtik aurrera. Bertara astelehenetik ostiralera joateko aukera izango dute ikasturte guztian zehar, 17:30etik 19:30 bitarte. Urteko kuota 40,40eurokoa izango da. 12-18 urteko gazteek, ordea, Gaztelekuan eman beharko dute izena. Ikasturtean zehar asteazkenetik larunbatera bitarte irekiko ditu ateak, 17:30etik 20:30era.
Itziar Ostolaza eta Ibai Narbarte, Gazteria zinegotzia eta Udal Ludoteka eta Gaztelekuen Koordinatzailea, hurrenez hurren.
