Herriko ikastetxean, euskaltegiak, liburutegiak, irakurketa kluba, liburu dendak eta udala bildu dira egitasmoaren bueltan.
Herriko hainbat eragile bildu dira euskarazko literatura bultzatu nahi duen egitasmoaren bueltan.
lelopean 16 urtetik gorako pertsonen artean euskarazko irakurzaletasuna bultzatzeko egitasmoa aurkeztu dute gaur Pasaian.
Antxoko liburutegian egin dute aurkezpena, ekimena babestu duten herriko eragile guztiak elkartuta. Pasaiako udaleko euskara saileko arduradunak ez ezik, udal liburutegietako arduradunak, ikastetxeetakoak, euskaltegietako ordezkariak, liburu dendetako jabeak eta literatura klubaren ordezkariak izan dira aurkezpenean.
“Haur eta gazteen artean ohikoa da euskaraz irakurtzea, baina 16 urtetik gorako herritarrek gaztelaniaz irakurtzen dute batik bat”, azaldu dute. “Ohitura horiek aldatzen laguntzeko ekimena da” Pasaian datozen bi hilabeteetan garatuko dena.
Deskontuak
Urrian eta azaroan izango da martxan egitasmoa. Bi hilabete horietan zehar, herritarrak, udal liburutegietan euskarazko liburua maileguan hartu eta hura itzultzean, irakurle fitxa bat bete, eta trukean erosketa txekea jasoko dute.
Liburutegietako erabiltzaileek, txeke hori erabilita Urdin (Antxo) eta Lema (Trintxerpe) liburu-dendetan %25 merkeago erosi ahal izango dute euskarazko liburu bat. Deskontu txartela %50koa izan da euskaltegietako ikasleentzat eta mintzalagunentzat.
Sariak
Horrez gain, kanpaina bitartean, udal liburutegi bakoitzean 30 euroko bi bale zozketatuko dituzte euskarazko literatura maileguan hartzen dutenen artean. Beraz, guztira, zortzi bale zozketatuko dira hilero, lau 16 urtetik beherako irakurleen artean, eta beste lau 16 urtetik gorakoentzat. Baleak euskarazko literatura erosteko izango dira.
Erosketa txekeak erabiltzeko azken eguna abenduaren 31 izango da, baita saridunek balea gastatzeko azken eguna ere.
Ekintza bereziak
Egitasmoa laguntzeko, eta helburu antzekoekin, udal liburutegiek hainbat ekintza paralelo antolatuko dituzte kanpaina martxan den bitartean. Iragarri dutenez, urriaren 24ean, 25ean, 26an eta 27an, ipuin kontaketa saioak izango dira liburutegietan Patata Tropikala taldearen eskutik. Horiek haurrei zuzenduta.
Gazteentzako, aldiz, eta zehazki Batxilergoko ikasleekin, beren gustuko idazleren batekin topaketa-solasaldia antolatuko dutela iragarri dute, eta helduentzako, berriz, San Pedroko eta Trintxerpeko
Irakurle Klubak jardueraren bat prestatuko duela aurreratu dute.
Zeharkako helburuak
Gaur aurkeztu duten egitasmoak, euskarazko irakurzaletasuna bultzatzearekin batera, beste hainbat helburu ditu, hala nola, udal liburutegien erabilera sustatzea, euskarazko literatura ezagutaraztea, euskal liburugintza indartzea eta herritarren kultur kontsumoan euskararen presentzia indartzea.
