Hezitzaileentzat eskola; "kalitatezko hezkuntza ez formala sustatzeko"
Errenterian aisialdian dabiltzan hezitzaileentzat formakuntza saioak eskaini ditu Udalak doan, "ikastetxeetatik kanpo ere hezkuntza sustatzeko".
Errenteria-Oreretako aisialdi elkarteetan lanean dabiltzan hezitzaileei zuzendutako formakuntza eskainiko du udalak. Hezkuntza “gizarte bat eraikitzeko tresna” gisa ulertuta abiatu dute egitasmoa, ikastetxeetatik kanpo “kalitatezko hezkuntza integrala gure espazioetan eta herrian” emateko aukera sustatzeko.
Errenteria-Oreretan haur eta nerabeekin udal aisialdian zein boluntario lanean ari diren hezitzaileen lana nabarmendu nahi izan dute. Izan ere, hortik abiatu da egitasmoa. Zazpi saioz osaturiko programa aurkeztu dute goizean Itziar Ostolaza Gazteria zinegotziak eta Arantxa Etxezurieta Hizkuntza eta Gazteria teknikariak. Urriaren 29an hasita, hileroko azken larunbateko goizetan izango dute parada, 10:00etatik 13:00etara Merkatuzarreko gela balioanitzean.
Udalak eskaintzen duen doako zerbitzu honetara, beraz, hezitzaile gisa jarduten dutenak daude deituta. Horretarako aurrez eman behar da izena, urriaren 24a baino lehen. 943 449 606 telefonora deituz edo helbide honetara mezua bidaliz egin daiteke.
Egitaraua; egunak eta gaiak
Itziar Ostolaza Gazteria zinegotzia eta Arantxa Etxezurieta Hizkuntza eta Gazteria teknikaria
- Urriak 29 – Haurren hiria; Arrasateko esperientziatik ikasiz. Txatxilipurdi elkartearen eskutik
- Azaroak 26 – Nola egin udaleku parte-hartzaileak; Oinherri elkartearen eskutik
- Urtarrilak 28 – Nerabeak eta drogak; Ailaket elkartearen eskutik
- Otsailak 25 – Hezkidetzan heziz, rolak ezabatuz; Arremanitz elkartearen eskutik
- Martxoak 25 – Haurrak, nerabeak eta sexualitatea; Arremanitz elkartearen eskutik
- Apirilak 29- Hezkuntza sortzailea; Idurre Ugalderen eskutik
- Maiatzak 27- Hizkuntzaren kudeaketa aisialdian; Euskaltzaleen Topagunearen eskutik
