Joseba Fernandez Urdaibaira doa. Hori gaurko albistea arraunean. HITZAk haren lehen iritziak jaso ditu.
Joseba Fernandez. (Argazkia: bermeorraun)
Gaur bertan jakin da Joseba Fernandezek (Pasai Donibane, 1974) Pasai Donibane Koxtape-San Juan utzi, eta Urdaibai entrenatzen hasiko dela. Bi arraun elkarteek eta Fernandezek berak baieztatu dute berria. HITZAk arraun entrenatzailearen lehen iritziak jaso ditu.
Urdaibaira joateko erabakia hartu duzu. Zergatik?
Batetik, San Juanen nik jarraitzeko baldintza egokienak ez nituelako izango, eta bestetik, Urdaibaik nire pertsonarekiko oso apustu serioa egin duelako. Ilusioa egin dit apustu horrek, eta gauza guztiak ikusita, eskaintza ekonomikoa barne, aurrerapausoa emateko erabakia hartu dut.
San Juanen jarraitzeko baldintza egokienak ez zenituela izango aipatu duzu. Zertaz ari zara?
Hori klubaren eta nire arteko gauza da. Nik San Juanen jarraitzeko baldintzak ez direla betetzen esan nahi dut bakarrik.
Urdaibai talde irabazlea da, eskakizun maila oso-oso handikoa. Hori badakizu.
Bai, noski. Argi dago arraunean kirol arloan egon daitekeen erronkarik zailenetakoa dela Urdaibai entrenatzea. Irabazlearekin berriz ere irabaztea da asmoa, horrek dakarren guztiarekin. Tira, beste antzeko egoera batean egon nintzen Castron 2008tik aurrera eta Juan Mari Etxaberekin batera, eta oraingoan ere ilusio berberarekin noa Bermeora.
Urdaibaiko presidenteak esan du klubaren lehen traineruaren bide onari jarraitu, eta harrobia landu nahi dutela zurekin.
Haien asmoa da Bermeoko, etxeko arraunlariak, lehen traineruan sartzen joatea. Adibidez, San Juanen edo Hondarribian egiten den bezainbeste ez, baina bai nahi dute bigarren ontzian duten jendearekin lan egin, eta horietatik 2-3-4 edo 5 arraunlari igo lehen trainerura. Hori izan da nik Urdaibairen eskaintza onartzeko arrazoietako bat, harrobi lana.
Zer nolako kontratua izango duzu?
Urtez urte berrikusiko den kontratua izango dut. Aurrera jarraituko dut gauzak ondo badoaz, eta nik lan egiteko baldintza onak ditudala ikusten badut.
Bost urte egin dituzu azken etapan Donibanen: Kontxako eta San Miguel Ligako ohorezko txandan utzi duzu taldea, aurten bandera bat irabazi duzue. Zein da lan horren zure balorazioa?
Oso positiboa. Oso zoriontsu izan naiz San Juanen. Amets bat egi bihurtzeko aukera eman didate, eta horrekin pozik gelditzen naiz. Gainera, izan dudan arraunlari multzoa sekula izan dudan onena izan da. Oso jende serioa, konprometitua, ilusioz betea topatu dut, sentimendu eta ilusio handikoa. Haiekin lan egitea plazera izan da, haiek egin dute ia-ia nik baino gehiago. Nik bidea markatuko nien, baina arraunlarien jarrera, batasuna eta taldekideak zaintzeko grinak egin du nire lana asko erraztea. Emaitzak hortik etorri dira.
Itzultzeko ateak zabalik dituzu?
Espero dut baietz. Ez dut uste San Juanen itxita edukiko dituztenik. Nire kluba da betidanik. Badakit orain minduta senti daitezkeela nire erabakiarekin, baina uste dut ulertzeko modukoa dela. Egoera batzuk sortu dira, eta nirekin klubak bete behar zituen baldintza batzuk ez dira bete. Besterik ez. Gelditzearen artean eta joatearen artean alde handia zegoen, eta guk etxean ere denean pentsatu behar dugu.
