Irailerko ohiko udalbatzarrak 8 punturen artean EH Bildu eta Irabaziz alderdiek aurkeztutako mozioa tratatu zuten, Lekuona Arte Eszenikoen Zentroaren proiektuari buruz. Horren aldeko bozkak gailendu ziren.
Errenteriako astearteko plenoan Lekuona Arte Eszenikoen proiektuaren inguruko bozketan
Asteartean egin zuen ohiko udalbatzarra Errenteriako Udalak. EH Bilduk eta Irabaziz alderdiek aurkeztutako mozioaren inguruan luze jardun ziren; Lekuona fabrika zaharra Arte Eszenikoen Zentro bihurtzearen
proiektuaz, hain zuzen. Gehiengoarekin proiektua babestu eta aurrera jarraitzea erabaki zen, baina eman zuen zer esana.
Zortzi puntu zituzten prestatuta astearteko plenoan garatzeko. Lehen zazpiak azkar batean onartu zituzten eta azkenak piztu zuen eztabaida. Lekuona fabrika Arte Eszenikoen Zentroa bilakatzeko proiektuan aldaketak egon direla leporatzen dio
PSE-EEk EH Bilduri. Kostuan, aforoan, bolumenean eta
Diputazioarekin egindako konbenioan batik bat. Julen Mendoza alkateak 17 dokumentu atera zituen plenoan sozialisten argudioak kontraesanez. “Hasieratik zaudete proiektuaren kontra eta gauzak nahasten dituzue zuen intereserako erabiltzeko”, esan zien PSE-EEko kideei, “iritzi publikoa manipulatzen ari zarete eta gauzak argi utziko ditugu”. PSE-EEko Jose Angel Rodriguezek datu desberdinak zituztela ihardetsi zuen, eta beste alderdiek gehiengoa izan arren, ez zutela haien baiezkoa lortuko.
EH Bilduk udalbatzarrean gaineratu zuen Lekuona ogi fabrika zaharrarekin zer egin beste alternatibarik ez dela aurkeztu, eta Arte Eszenikoen Zentroa sortzearen proiektua hasieratik aurkeztu zenean aldaketarik ez duela jasan nabarmendu zuen. PSE-EEri Lekuona eraikin soil bat bezala ikusten zuela esan zion, gobernu taldeak “sormena, kultura eta hiri modelo” gisa ulertzen zuten bitartean. Errenteria-Oreretari onurak ekarriko dizkiola gaineratu zuten, Donostiako Arteleku hustearen beharra dagoenez, Errenteriak hartuko lukeela indarra. Herri honek baduela dantzarekin lotura handia zehaztu zuen. PSE-EEk “akatsez beteriko proiektua” dela esan zuen behin eta berriz, eta ez datozela hiri eredu horrekin bat.
Bakoitza bere ikuspuntu eta argudioekin, ez zuten gaiarekiko adostasunik lortu. Mendozak, jendea “mareatzeari uzteko” publikoki bilera bat egiteko proposatu zion PSE-EEri, baina sozialisten eledunak ez zuen erantzunik eman. Hala, Irabaziz alderdiak EH Bilduren argudioak babestu eta indartu zituen, eta EAJ ere aldeko azaldu zen. Horrela, bozketak erabaki zuen Lekuona Arte Eszenikoen Zentroaren obrekin jarraitzea.
