Julen Mendoza: "Lekuona ez da kapritxoa, proiektu garrantzitsua da".
Lekuona Arte Eszenikoen Zentroari buruzko erabakiarekin pozik baina Udaleko PSE-EEko kideen jarrerarekin kezkatuta azaldu dira kultura zinegotzia eta alkatea.
Lekuona Arte Eszenikoen Zentroaren proiektuari babesa eman zion astearteko plenoan Errenteriako udaletxeak. PSE-EEko kontrako iritzia eta ematen ari den eztabaidaren harira, prentsaurrekoa egin dute goizean Julen Mendoza alkateak (EH Bildu) eta Yon Collar kultura zinegotziak (Irabaziz).
Udalbatzarrean hartutako erabakiarekin pozik azaldu dira Mendoza eta Collar. Lekuona proiektua ez dela “kapritxo” bat adierazi dute, Errenteriako 2025 Plan Estrategikotik datorrela eta kultura, ekonomia, politka eta gizarte arloko 268 pertsonen parte hartzearekin kontatzen duela. Proiektuak herriari on egingo diola gaineratu dute, industriaren gainetik kultura eta sormena gailenduko delako eta “hiri-modeloa” hobetu.
Hala nola, PSE-EE alderdiaren jarrerarekin kezkatuta azaldu dira eta hor finkatu dituzte prentsaurrekoko hitzak: “PSE-EEren ekarpena funtsezkoagoa eta arrakastatsuagoa izango da modu positiboan eginez gero. Interes politikoaren aurretik, interes orokorra jarriko balute”. Proiektua ahalik eta azkarren eta ondoen ateratzeko beharrezkotzat jo dute hori.
PSE-EE “bakar-bakarrik” dagoela gaineratu dute, eta ez dute ulertzen zergatik mantentzen diren jarrera horretan. Hausnarketa bat egitera gonbidatzen dituzte, udaleko kide guztien babesarekin aurrera egiteko. Era berean, “akusazio larri eta faltsuak” egiteari uzteko eskatu diete: “Ez dakite espedienteko dokumentuak irakurtzen, kontzeptu eta kostuak nahasten ari baitira”. Obren kudeaketan irregulartasunik ez dagoela azpimarratu dute, eta “gardentasunez” jokatzen ari direla.
Yon Collar kultura zinegotzia eta Julen Mendoza alkatea
Erlazionatutako edukiaAstearteko plenoa Lekuona Arte Eszenikoen Zentroaren alde
