Lekuz kanpo, tona bat hondakin eta 15.000 euro
Udalak 15.000 euro gastatzen ditu pasaitarrek ezarrita dauden bilketa egunak errespetatu gabe ateratzen dituzten tamaina handiko hondakinak biltzen.
Udalak jakinarazi du “baliabide asko” inbertitzen ari dela “bide publikoa txukun eta garbi mantentzeko” eta, kaleetan bilketa egunetatik kanpo uzten den tona bat hondakin inguru biltzen ari dela ohartarazi du.
Ez ohiko bilketa horrek 15.000euro suposatzen dizkio udalari. Horregatik, udalak gogorarazi du tamaina handiko hondakinak biltzeko egunak eta lekuak errespetatu behar direla. “Pasaitar askoren gizalege ezaren ondorioz, udalak urtero-urtero behar baino 15.000 euro gehiago gastatzen du, altzari eta tresna erabil ezinak kaleetan denbora luzean gera ez daitezen”, kexatu da udala.
Lau barrutietan zenbait gune ezarrita daude, hiri-hondakin solidoen edukiontzietan sartu ezin diren tamaina handiko hondakinak –altzariak eta beste– uzteko. Era berean, horiek jaisteko barruti bakoitzak astegun bat ezarrita duela gogorarazi du, kasu guztietan, 20:00etatik 24:00etara.
- Trintxerpen: astelehena.
- San Pedron: asteartea.
- Donibanen: asteazkena.
- Pasai Antxo: osteguna.
