"Memoria historikoa eta duintasuna berreskuratzeko" jarduerak egingo dituzte
Memoria Historikoa lantzen duen Oarsoaldeko Pikoketa talde errepublikarrak erakusketa, hitzaldia eta dokumentala antolatu ditu, frankismoan hilobiratutakoak ardatz hartuta.
Oarsoaldeako Pikoketa Talde Errepublikazaleak hainbat jarduera antolatu ditu Errenterian “memoria historikoa eta duintasuna berreskuratzeko”. Erakusketa, hitzaldia eta dokumentala prestatu dituzte, horretarako, urriaren 4tik 22ra Xenpelarreko eraikina betetzeko. Gaur aurkeztu dituzte jarduera horiek.
18 eguneko egitarauak Exhumando fosas, recuperando dignidades izeneko erakusketa izango du ardatz. Aranzadi Zientzia Elkartea eta Memoria Historikoaren Berreskurapenerako Elkartearen (ARMH) kolaborazioekin eraman dute aurrera. 1936ko gerran hildakoak hilobitik atera eta ezagutaraziko dituzte panel desberdinen bitartez. 2000. urtetik ari dira gaia jorratzen aipatutako elkarteak. Erakusketa lau gairen baitan jorratuko da: pertsonak, hilobiak, laborategia eta omenaldia. Erakusketa urriaren 4tik 22ra bitarte egongo da ikusgai Errenteria-Oreretako Xenpelar Etxean.
Bigarrenez, hitzaldi bat antolatu dute urriaren 6ko arratsalderako. Emilio Silva kazetariak eta ARMHko sortzaile eta zuzendariak emango du. “Elkarte honek urteak daramatza 1936ko gerraren errepresioaren biktima izan diren hilobiratuak eremu frankistan bilatzen”, azaldu dute prentsaurrekoan. Hizlariak bere aitona zegoen hilobia aurkitu zuen 2000.urteko martxoan beste 12 “ezkertiar eta errepublikar militanteekin” batera (Los trece de Priaranza). Memoria lurpetik ateratzen, inpunitatea lurperatzeko hitzaldiari 19:00etan emango zaio hasiera Xenpelarren bertan.
Azkenik, dokumental baten proiekzioa egingo dute: Las Cunetas. Adriana izeneko neska argentinar baten istorioa kontatzen du. Bere aita eta osabarekin Espainiara egindako bidaiaz ariko dira, El Cesterin izeneko aitonaren deshilobiratzea ikusteko. Hala, Espainian frankismo garaiko 150.000 biktima desagertuta daudela kontatu dute gaurko agerraldian, tartean El Cesterin. Dokumentalaren eguna eta ordua zehaztu gabe dituzte, baina erakusketak irauten duen epe horren barruan izango dela aurreratu dute.
Memoria Historikoa berreskuratzeko ekimenak antolatu ditu Pikoketa elkarteak.
