Erabakirantz giza katea

Kaleko mobilizazioei dagokionez, Demoarsoren lehen erronka erraldoia etzi izango da. Pasaiako badia 10.000 herritarrez inguratzea ez da izango iniziatibaren helburu bakarra. Erabakirantz giza katea

Urko Etxebeste Petrirena

Errenteria-Orereta,Lezo,Oiartzun,Pasaia

2016/11/04

Honakoak lekukoak, bozka eta hautetsontzia, eramango dituztenetako batzuk dira. Joan den ostegunean Oiartzunen agerraldia egin zuten.

Bihar beteko dira 83 urte Oarsoaldeko herritarrek, lehen aldiz, estatus politikoaren gaineko galdeketa batean parte hartu zutenetik. Hori bakarrik ez. 1933ko azaroaren hasierako egun horretan emakumeek lehenengoz ere bozkatzeko aukera izan zuten. Autonomia Estatutuaren gaineko galdeketa izan zen orduko hura. Etzi, azaroaren 6a, erabakitzeko eskubidearen aldeko giza kate erraldoia egingo dute Oarsoaldean, Pasaiako badia milaka eskurekin inguratuz. Demoarso iniziatiba da horren deitzailea, Gure Esku Dago-k azken urteetan daraman dinamikarekin bat eginez. Pasaiako badia inguratzen duten 8.400 metroak pertsonaz betetzea da igandeko ekintzaren helburuaren zati bat, 8.000 eta 10.000 pertsona artean jarri dute helburua: helburu kuantitatiboa, eta erabakitzeko eskubidearen alde nor dagoen jakiteko termometro antzekoa, zifretan. 2017ko martxoaren 19an egin nahi den erabakitzeko eskubidearen aldeko herri galdeketarako indar erakustaldia beharbada izan daiteke, edo oraindik horren berri izan ez dutenei oharra, euren agendan data hori apunta dezaten. Baina Demoarsoko kideek ere xede kualitatiboan jarri dute enfasia. Demoarsorekin bat egin dutenak etzi askotariko argazkia lortzeko lanean egon dira azken asteetan, herriz herri. Sentsibilitate ezberdineko eskuak elkartu nahi dituzte; zer erabaki baino, erabakitzeko ariketa bera egitea delako une honetan Demoarsori sakonean inporta zaiona: giza katearekin martxoaren 19ko kontsultara begira jendea mobilizatu nahi dute. 100 metroko 85 zatitan banatu dute Pasaiako badia, bi muturretik abiatuta —San Pedrotik eta Donibanetik—, eta zati horietako bakoitzean herritarrak, nahiz lekukoak eramango dituztenak (bozka bat eta hautetsontzi bat) elkartuko dira, Demoarsoren arabera aniztasunaren eta nahi komun eta unibertsal baten adierazle izango dena aldarrikatzeko: «Pasaiako badiaren inguruan ditugun herrien dibertsitatetik, bakoitzaren partikularitatetik, helburu komun bat badagoela azaltzea nahi dugu». Geroaz Etzi lekukoak eramango dituztenek aurreko ostegunean esan zutenez, «herri honen geroa denon artean» erabaki behar da. Eta hori jatorriaren, pentsaeraren, edo lan egiten den sektorearen gainetik dagoela jakinarazi zuten. Pertsona ezagun edo esanguratsuek elkarri emango dizkiote lekuko horiek, bozka eta hautetsontzia, Pasaiako bi barrutietatik Errenteria-Oreretarako bidean sortuko diren bi adarren 85 zatietan. Igandekoa «erronka izugarri» bezala definitu zuten Oiartzunen egin zuten agerraldian, «baina are handiagoa da ilusioa». Erabakitzeko eskubidea gauzatzeko bidea «elkarrekin» egin beharrekoa dela adierazi zuten, «eta ezinbestekoa da konplizitateak ehundu eta elkarrekin adostu eta erabakitzea». Bide horretarako, etziko giza katea mugarri izan daitekeela adierazi zuten lekukoak eramango dituztenek, «Euskal Herriko hainbat lekutan hasitako olatu hori Oarsoaldera iritsi da». HITZAn, jarraipena Oarso Bidasoko Hitzak, Interneteko edizioaren bitartez (oarsoaldea.hitza.eus), etzi gertatuko denaren informazioa unean-unean emango du. Giza katearen bi muturretan egoteaz gain, Errenteria-Oreretako azken ekitaldian egongo da. Sare sozialetan ere, Twiterren eta Facebooken, zabalduko ditu Hitzak esandakoak eta argazki galeriak.

Hasieratik bukaerara, esanahiz betetako ekitaldia

Errenteria-Oreretako Zumardian bat egingo dute giza katearen bi muturrek.

Itsasoan hasiko da giza katea, eta Errenteriako Gamon Zumardian bukatzen den arte mezu asko partekatuko ditu

Etzi, herri baten nahiaren berri emateko bilduko dira milaka herritar. Erabakitzeko eskubidearen aldeko mezuak batez ere goizetik eguerdi parteraino emango dituzte. Bazkalostean iritsiko da bestelako gozamenerako garaia. Itsasoan hasiko da giza katea. Albaolako bi ontzitan giza katean eskuz esku ibiliko diren hautetsontzia eta bozka Pasaiako badiaren alde banara eramango dituzte, 11:45ean: San Pedroko Torreatzera eta Donibaneko Santiago plazan utziko dituzte bi testiguak, eta han harrera egingo diete. Orduan hasiko da giza katea, 12:00ak inguruan. Hori bitartean, eskualdeko arraun elkarteetako bost traineruk Gure Esku Dago-ren logotipoa, eskua, egingo dute itsasoan. Pasaiako badiaren alde banatik joango dira hautetsontzia eta bozka, lekukoak eramateko hautatuak izan direnek eramanda: herri bakoitzeko pertsona ezagun edo esanguratsuak izango dira, jada osatuta egongo den giza katearen ondoan bi elementu horiek eramango dituztenak. Horrela, tramoz tramo (85 dira orotara; 140 inguru lekuko eramale), Errenteria Oreretako Gamon Zumardiraino. Ekitaldia 13:00ak aldera iritsiko dira bi lekukoak bukaerara, bat egingo dute biek Gamon Zumardian: bozka hautetsontzian sartuko dute, demokraziaren ariketa oinarrizkoena sinbolizatuz. Bertako karpan ekitaldia egingo dute. Demoarsoko kideek hitz egingo dute, baita herritarrek ere; ez da ekitaldi luzea izango iniziatibako kideek esan dutenez. Hizketaldietan garrantzia berezia emango diete adinekoei eta gazteei, emakumeei eta gizonei, iraganari eta etorkizunari. Horren ondoren jaiari tartea zabalduko diote Errenteria-Oreretan.

Bi belaunaldi, eskubide bakarra

Demoarsok iganderako deitu duen giza katearekin bat egin eta erabakitzeko eskubidearen alde egin dute Conchi Sanchez eta Antonio Prior eta errepublikazaleek (erdian), eta Izaro Ibarguren eta Anatz Elizondo gazteek (alboetan). Atzo egin zuten agerraldia, irudikatzeko erabakitzeko eskubideak ez duela adin mugarik. Sanchez sanjuandarra eta Prior errenteriarra frankismoaren errepresioaren ondorioz erbestera joandakoak izan ziren, urte luzez bizi izan ziren sorterritik kanpo; egun 90 urte dituzte. Ibargurenek eta Elizondok 16 urte dituzte: martxoaren 19an eman ahal izango dutez lehenengoz botoa. Giza katearen ondorengoak bide orrian daude 2017ko matxoaren 19ko herri galdeketa arteko bidean lau mugarri ezarri ditu Demoarsok. Lehena etziko giza katea da. Baina aurrerago egin beharrekoak ere zehaztuta dauzka iniziatibak. Azaro bukaeran, herriz herri, kontsultarako galdera adosteko bidea hasiko dute, prozesu parte hartzaile baten bitartez. «Erronka izugarri hau posible egiteko boluntarioak lortu eta aktibatuko ditugu, bozkalekuak zehaztu, eta galdeketak egiteko lantaldeak osatuko ditugu besteak beste». Herri bakoitzak bere galdera erabakiko du. Gabonak pasata, herri galdeketaren gaineko aurrekanpainari ekingo dio Demoarsok. Etxez etxe informazioa emateko asmoa dute iniziatibako ordezkariek; denei eman nahi diete informaziorako eskubidea. Otsailean iritsiko da herri galdeketarako kanpaina. «Erabakira eramango gaituen kanpaina herritarra izango da», esan du Demoarsok.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.