Hogeita bosgarren urteurrena osapatzen ari da aurten Landarbaso Abesbatza, eta ospakizunen barruan Landarbaso 25! proiektua aurkeztuko du abesbatzak larunbatean Fatimako Andra Mariaren elizan.
Ion Collar Kultura zinegotzia, Txema Arenzana liburuaren egilea, eta Iñaki Tolaretxipi Landarbasoren zuzendaria atzoko agerraldian. Argazkia: Carrera.
Hogeita bosgarren urteurrena osapatzen ari da aurten Landarbaso Abesbatza, eta ospakizunen barruan Landarbaso 25! proiektua aurkeztuko du abesbatzak larunbatean Fatimako Andra Mariaren elizan. Abesbatza izanik, goi mailako musikarekin jantzi dute urteurrenaren ekitaldi instituzional garrantzitsuena izango dena, baina baita hitzekin ere. Izan ere, larunbatean eta kontzertuaren barruan Landarbasoren ibilbidea biltzeko Txema Arenzana errenteriarrak idatzi duen liburua aurkeztuko dute.
Landarbaso 25 urte liburua larunbat arratsaldean bertan jarriko dute salgai 15 euroan.
Landarbaso 25! proiektuaren barruan Kontari egitasmoa aurkeztuko dute jendaurrean. Aurtengo urrian jarri zuen Landarbasok martxan Kontari, 9 eta 13 urte arteko gazteak biltzen dituen abesbatza, eta lehen aldiz abestuko du publikoan. Josu Elberdin konpositoreak larunbateko ekitaldirako espreski sortu duen
Te Deum obra estreinatuko du, gainera, Landarbasok: “Hiru abesbatza eta pianoarentzat idatzitako obra Landarbasotik pasa diren 26 abeslari ohietako batzuk eramango dute oholtzara. Gaur egungoa izango da abesbatza nagusia, eta berarekin batera arituko dira Landarbasoren lehenengo urteetako abeslariak (1991-2003), eta bigarren aldikoak (2004-2015).
Kontzertuaren bigarren zatian John Rutterren
Magnificat lana entzun ahalko dute bertaratzen direnek. Miren Urbieta soprano bakarlariarekin batera, Kaabestri Ensemble eta emanaldirako bereziki etorritako beste instrumentistak arituko dira.
Larunbateko emanaldian Landarbaso osatzen duten kide guztiek abestuko dute, Kontari, gazte taldea eta Landarbasok, 106 kidek guztira.
Emanaldia EITBko kazetaria den Juan Carlos Etxeberria kazetariak aurkeztuko du eta sarrerak dagoeneko salgai dira 7 euroan Niessengo takilan, asteartetik ostiralera 10:00etatik 13:00etara eta 17:00etatik 20:00etara, eta larunbatean 10:00etatik 13:00etara. 12 urte arteko aurren sarrerak, 3 euro balio dute. Emanaldia baino ordubete aurretik ere erosi ahalko dira sarrerak elizan bertan.
Erakusketa eta kontzertu solidarioa
Urteurrena ospatzeko antolatutako ekintzen barruan, Landarbaso abesbatzaren ibilbidea biltzen duen erakusketa antolatuko duela taldeak iragarri dute arduradunek, eta baita gabonetan egingo duten kontzertu solidarioa.
Orain arte berriz, eta urteurrenaren barruan,
Konplize ditut eta… diskoa kaleratu, Munduan 1 eta 2, Ez Dok Hamahiru, San Inazio eguneko kontzertu berezia eta Donostiako Musika Hamabostaldian emanaldia egin ditu abesbatzak.
