Errefuxiatuak, migranteak, mugak, itxaropena eta indarkeria. Horiek dira ‘Arizona’ antzerkiaren oinarriak. Bihar Lezon ikus daiteke.
Juan Carlos Rubio. Argazkia: Sergio Parra.
Goi mailako antzerkia bihar Lezoko Gezala Auditoriumean, Histrión taldearen eskutik. Juan Carlos Rubiok kordobarrak 2005ean idatzi zuen
Arizona lana, Ameriketako Estatu Batuetako (AEB) estatu horretako mugan zegoen gatazkaz arduratuta: mugaren Mexikoko aldetik zetozenak kanporatzeko herritarren patruila armatuak sortu zituzten. Juan Carlos Rubio gidoigile eta zuzendariak eman dizkio lanaren gaineko xehetasunak HITZAri.
Arizona mugak zaintzeari buruzko antzerki lana da, mugetatik haraino etor daitekeenaren beldurraz ari da. Baina zein da beldur horren arrazoia?
Ezagutzen ez denari beldurraz ari da
Arizona. Galdera asko planteatzen dira lanean, dogmak zalantzan jartzen dira, eta adierazi nahi dena da arrazonamendurik gabeko sinesmenek ez dutela ezertarako balio.
Arizona-k planteatzen duena da ezagutu nahi ez dugunaren gaineko beldurra izaten dugula. Mexiko eta AEBko Arizona estatuko muga da lanaren oinarria, muga fisikoa baino, burukoa. Eta horren inguruan sortu den indarkeriaz eta zentzugabekeriaz mintzo da.
Lanaren bi protagonistak, George eta Margaret, irmo hasten dira euren lurraldea defendatzen kanpokoen kontra. Baina Margaret zalantzak izaten hasten da…
Margaretek sentitzen duena gizaki guztiok sentitzen dugu. Gure bizitzako une askotan gauzak zalantzan jar ditzakegu, edo galde diezaiokegu gure buruari ea zertan ari garen: hori sentitzen du Margaretek. Galdetzen hasten da Mexikotik datorrena nor den, zergatik jauzi egin nahi duen AEBetara, zerk eraman duen bidai hori egitera. Margaret niretzat itxaropenaren irudia da, mundu hobe eta justuago baten esperantzaren irudia.
2005ean idatzi zenuen Arizona.?Baina bertan esaten direnek zentzu osoa dute egun, AEBtan eta Europan.Arizona izena du lanak, baina Mediterraneoan eta Europan gertatzen ari dena antzekoa da. Izugarria da hori guztia. Gainera, orain, Donald Trump-en etorrerarekin uste dut indar handiagoa hartu duela
Arizona-n esan nahi denak.
Ikuskizuna gogorra, baina beharrezkoa dela esan duzu.
Beharrezkoa da konturatzea egunero telebistan ikusten ditugun errefuxiatuen irudi horiek konpontzea denon ardura dela. Kontzientzia hori piztu nahi du lanak, eta antzerkiak uste dut horretarako ere balio behar duela, kontzientziak astintzeko, eta noski, entretenitzeko.
Fitxa
Non eta noiz. Bihar (larunbata), 20:00etan Lezoko Gezala Auditoriumean. Zortzi euro. Gazteleraz da
Partaideak. Zuzendaria eta gidoilaria: Juan Carlos Rubio; Aktoreak: Histrión Teatro konpainiako Gema Matarranz eta David Garcia-Intriago.
