Azken geltokiari begira esku gehiago batu nahi ditu Demoarsok

Martxoaren 19ko galdeketari begira jende gehiago biltzea ezinbestekoa dela nabarmendu du dinamikak. Hurrengo astetan, galderak zehazteko dinamikak martxan jarriko ditu Demoarsok Errenteria-Oreretan, Pasaian, Oiartzunen eta Lezon.

Ikerne Zarate Gartziarena

Errenteria-Orereta,Lezo,Oiartzun,Pasaia

2016/11/21

Donibanen hasi zen giza katearen bi besoetako bat.

Lehen erronka gaindituta, azken geltokiari begira jarri da Demoarso. Bidean ordea, eskerrak eman dizkio dinamikak, joan den hilaren 6an Pasaiako Badia inguratu zuen giza katean parte hartu zuten herritar eta eragileei, eta boluntario lanetan aritu ziren 300 lagunei. Balorazio positiboa egin du dinamikak giza katearen gainean, “katea mobilizazio edo elkarretaratze masibo bat baino askoz ere konplexuagoa izan zen. Borondate eta konplizitate asko lotu behar izan genituen, zailtasun teknikoak gainditu, 300 boluntario lotu eta ehunka pertsona jarri ingurukoak animatzen. Baina lortu genuen eta emaitza ezin ederragoa izan zen”. Demoarsoren hitzetan, Pasaiako Badia inguratu zuen giza katea Oarsoaldeko mobilizazio soziopolitiko handiena izan da. Katearen ibilbidearen 8.500 metroak lotzeko adina lagun behar zituzten eta lortu zituzten, eguraldiak lagundu ez bazuen ere. “Sektore, jatorri, eta sentsibilitate ezberdinetako jendea batu zen aldarrikapen zahar bezain sentitu honen atzetik, baita Oarsoaldeko eragile sozial ia guztiak ere. Handia egin dugu Oarsoaldean, eta handiagoa egitera goaz”. Horretarako, martxoaren 19ko galdeketari begira jende gehiago biltzea ezinbestekoa dela nabarmendu du dinamikak, “oraindik askoz gehiago dira dinamika honetara eta finean erabakira batu behar ditugun izen, izan, esku, gogo, bihotz eta ahotsak. Lan handia dago egiteko aldarrikapen honen atzean gehiengo sozial eta soziologikoa espresio kolektibo batean biltzeko”. Hurrengo astetan, galderak zehazteko dinamikak martxan jarriko ditu Demoarsok Errenteria-Oreretan, Pasaian, Oiartzunen eta Lezon eta baita hedapen kanpainaren prestaketa eta kontsulta eguna antolatzeko boluntarioek izena emateko prozesua ere.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.