Sorkuntza eta kolaborazioa bertatik bertara ezagutzeko

2016/11/21

Julen Mendoza alkatea eta Ainhoa Aizpuru diputatua Habian! proiektuaren aurkezpenean.

Torrekuak ateak parez pare zabalduko ditu asteburuan. Zehazki, Habian! proiektuaren barruan abiatutako Fabrika Kreaktiboa bertatik bertara ikusi eta han lanean ari diren artisauen lana zuzenean ezagutzeko aukera izango dute interesa dutenek. Bi tailer ditu Fabrika Kreaktiboak, bata ehungintza lantzeko, eta bestea, bitxigintzarako. Tailer horietan, sortzaileek produktuak ekoitzeko behar duten makineria dute eskura eta bertan lan egiteko aukera, elkarrengandik ikasiz eta kolaboratuz. Ehungintza tailerraren barruan lau lanpostu sortu dituzte, eta sei bitxigintzan. Profesionalizatzeko bidean edo profesionalizatu berriak diren proiektuei eskaintzen diete bertan lan egiteko aukera, gehienez hiru urtez. Sortzaileek epe luzeko proiektuen oinarriak sendotzea du helburu proiektuak, gero beren kabuz jarraitu eta jarduera ofizio iraunkor bilaka dezaten. Oarsoaldea, Easo Politeknikoaren, AEG Ikastetxearen eta Artiolaren aholkularitza jasotzen dute gainera. Bisitak hilaren 25etik 27ra egingo dituzte. Ostiralean 16:30etik 20:30era eta larunbata eta igandean 10:30etik 14:30era eta 16:30etik 20:30era izango dira zabalik Torrekuako tailerrak bisitarientzat. Tailerrak bisitatzeko interesa izanik asteburuan ezin duten pertsonek Oarsoaldearekin harremanetan jar daitezke posta elektronikora mezua bidalita edo 943 49 41 26 telefono zenbakira deituta. Ekintzailetasun Kolaboratiboaren poloak joan den martxoan hasi zuen bidea. Euskal Autonomi Erkidegoko (EAE) elkarlaneko artisau eta sormen lanbideetan eta teknologia berrien esparruko elkarlaneko lehen hazitegia izan da Torrekuakoa.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.