Izen-emate epea zabalik dago jada abenduaren 23an lehiatuko den herri lasterketarako.
![antxo, krosa](http://oarsoaldea.hitza.eus/site/files/2016/11/antxo.krosa_.jpg)
Gauez egiten da azkeneko urtetan Antxoko Gabonetako herri lasterketa; aurten 20:30ean hasiko da.
Data egokian heldu da aurten berriz ere Antxoko VII. Gabonetako Krosa. Abenduaren 23an lehiatuko da, eta hala izanik prestaketa egokia izan daiteke urtea San Silbestre lasterketa korri eginez agurtzeko asmoa dutenentzat eta bide batez, Gabonetako gehiegikeriak arintzeko baliagarria.
Pasai Antxoko Gabonetako Krosa urtez urte hazten ari den herri lasterketa da. 2014ko edizioan 102 partaide izan ziren, eta iaz, berriz, 200. Aurten kopuru hori gainditu nahi dute antolatzaileek. Iaz Oarsoaldean egin ziren herri lasterketen artean, partaide gehien izan zituen hirugarrena izan zela goraipatu dute lasterketaren antolatzaileek.
Askotariko adineko korrikalariek izena eman ohi dute proban, eta emakumeen partaidetzari dagokionez, batez besteko altuenetakoa du lasterketak. Iaz % 35koa izan zen emakumeen parte hartzea.
Maila handiko korrikalariak eta herri korrikalariak bildu nahi ditu lasterketak eta azken urteetan hori lortzen ari direla iritzi diote antolatzaileek, parte hartzaileen kopuruaren bilakaera aztertuta. Horrez gain, herrian bertan lasterketa egunean sortzen den giroa goraipatu dute, eta iaz krosa ikusten 2000 lagun inguru izan zirela jakinarazi dute.
Izena emateko epea zabalik dago jada,
Kirolprobak plataformako webgunean. Kros hau Kirolprobak Gipuzkoako Herri Lasterketen ligaren barruan dago, A Mailakoetan.