Lezoko EH Bilduren ustez, ostegunean onartutako mozioak hondakinen gaian herritarrei emango die hitza. Aurretik birziklatze tasak zenbatekoa izan behar duen adostu beharko lukete udaleko alderdiek, "gutxienez egungoa mantendu behar da".
Intxaurrandieta eta Arruti gaurko agerraldian.
Osteguneko udalbatzarrean, EH Bilduren ekimenez eta koalizioko zinegotzien nahiz PSE-EEkoaren aldeko botoekin, hondakinen bilketaren gaian zer esana emango duen
mozioa onartu zuten zinegotziek (EAJk horren kontra eman zuen botoa, hortaz, aldeko 7 boto eta kontrako 6 izan zituen).Mozio horretan, labur, bilduta zegoen egungo birziklatze tasa bermatuko duen (%80 inguru) sistema behar duela herriak, eta hori herri parte hartze prozesu baten ondorio —hondakinen mahaian, alderdiek, eragileek eta herritarrek osatua— izango den herri galdeketan onartuko dela: %80 inguruko tasa bermatuko luketen sistemen gaineko galdeketa litzateke, ondoren aukeratutakoa ezarri, eta zuzen egikaritzen ari dela jarraipena eginez.
Gaur, EH Bilduk mozioarekin zein asmo zuen azaltzeko agerraldia egin du, betiere ardatz garbi batekin: “Guretzat garrantzitsuena birziklapen tasa da. Sistemak helburu horretara iristeko tresna dira”. Hala, udalak birziklatze tasa irizpideak onartuko lituzke, eta herritarrek erabakiko lukete nola iritsi (zein sistemaren bitartez) ezarritako kopuru horietara.
Ainhoa Intxaurrandieta eta Mikel Arruti zinegotziek esan dutenez, “edonork onartzeko modukoa” zen koalizioak aurkeztu zuen testua, “askotan alderdi ezberdinek errepikatu dituzten ideiak biltzen ditu”. Eta bere egin dute
PSE-EEko zinegotziak mozioari buruz plenoan bertan esan zuena: “Erabakia gehitzeko da, ez kentzeko”. Izan ere, hondakinak biltzeko gaia ika-mika politikotik ateratzea eta herritarrei hitza ematea da EH Bilduren asmoa. Horrela, koalizioko kideen ustez, udalak abian jarri behar du plenoak onartutakoa, “proposamen eraginkor eta iraunkorra delako”, eta hori garatzeko mahaiaren gainean esertzeko prest agertu dira.
Baina Ainhoa Intxaurrandietak esan duenez, “arduragabekeria” litzateke egun Lezok duen birziklatze tasaren azpitik egongo litzatekeen sistema bat jartzea, “horregatik irizpide garbi bat markatu dugu: egungo tasa mantenduko duen sistema bat behar dugu. Sistemak zein tasa lortu behar duen markatzea ezinbestekoa da. Handik aurrera herritarrena da hitza”. Beste irizpide garbi bat mantendu behar dela uste dute EH Bilduko kideek: “Sistemak funtzionatzen badu, legealdiz legealdi mantendu behar den sistema izan behar du. Ezin dugu lau urtero, alkatetza aldatzen bada, sistema aldatu”.
Autokritika eta kritika
EH Bilduk osteguneko plenora eraman zuen proposamenak, Mikel Arrutik esan duenez, bide luzea du atzetik. Zinegotziak aitortu duenez, aurreko legealdian atez ateko sistema —”ikusi da funtzionatzen duela”—ezartzeko “moduan” ez zuten asmatu, “jendeak ez zuen ulertu nora jo nahi genuen, edo ez genuen asmatu. Eta horrek nolabaiteko egonezina eta kezka sortu zuen hainbat herritarren artean”.
Handik abiatuta, hondakinen sistema berria ezartzeko orduan “jende asko identifikatuta sentituko ez den sistema bat” ez zuten nahi. Hala ere, Arrutik esan duenez, udalak jarri asmo zuen bosgarren edukiontziaren sistemarekin ere ez dago ados herritarren zati handi bat, “gainera inolako kontsultarik, galdeketarik edo adostasunik gabe jarri nahi dute”.
Egun Lezon indarrean dagoen hondakinak biltzeko sistema atez atekoa da. Iaz, EAJk eta EH Bilduk onartu zuten sistema mistoari ekitea, baina EAJren barruko krisiaren ondorioz, alderdi horrek alkatea aldatu, eta irailean adierazi zuen bost edukiontziko sistema jarriko dutela herrian (azken hori ez du udalbatzarrak onartu).
