Euskararen astea, pauso bat aurrera emateko
Aste osoan zehar ekitaldiak egingo badituzte ere, Euskararen Nazioarteko Egunean, larunbatean izango dira ekintza gehien, tartean, ekitaldi nagusia.
Euskararen Eguneko ekitaldia duela bi urte.
Euskararen Nazioarteko Eguna dela eta egitarau zabala prestatu dute aste osoan zehar Lau Haizetara Euskaltzaleon Topaguneak, Errenteria-Oreretako ikastetxeek, udalak eta beste hainbat eragileek elkarlanean. Dagoeneko, martxan du Lau Haizetarak sare sozialetan zabaltzen ari den Pausu bat aurrera konpromiso kanpaina. Herritarren euskararen aldeko norbanako eta familia argazkiak jasotzen ari da horren bidez euskara elkartea. Herriko ikastetxeetan berriz, Pauso Bat Aurrera lanketa egiten ari dira eta baita mosaikoa ere, eta ludoteketan berriz, Euskararen sentsibilizazio eta hausnarketa saioak.
Abenduaren 1ean, ostegunean, Mintzodromoa egingo dute Lau Haizetarak antolatuta Galtzarabordako kiroldegian eta Xenpelar AEK eta Udal Euskaltegiko hamarnaka eta hamarnaka ikasleek hartuko dute parte 09:30etan hasita. Arratsaldean, 16:30etik aurrera errepikatuko dute Mintzodromoa. Niessen Kulturguneak berriz Udal Euskaltegiak antolatutako Kreditua antzezlana hartuko du 10:00etan. Egun horretarako, gainera, pintxo potea euskaraz antolatu du euskara elkarteak erdialdeko tabernetan.
Gazteek hartuko dute lekukoa ostiralean, Euskararen Nazioarteko Egunaren bezperan. Lau Haizetararen barruko Kuadrillategi programan eta Gazte Lekuetan ari diren gazteak elkarlanean arituko dira Merkatuzarren 18:30etik aurrera. Ordu erdi beranduago, Oarsoaldeko Euskara Batzordeak antolatutako Oarsoarrak saria banatuko dute Xenpelar Etxean. Karlos Ibarguren sendagileak jasoko du sari hori aurten, euskararen alde egin duen eta egiten jarraitzen duen ibilbideagatik.
Ekitaldi nagusia
Larunbatean egingo dituzte ekitaldi gehien eta eguerdian hasita, arratsera arte bideo emanaldia, antzerkia, karaokea, Xenpelar sarien banaketa eta ekitaldi nagusia egingo dituzte. Gaztetxeak antolatuta egingo dute bideo emanaldia 12:00etan Merkatuzarren euskararen gainean, eta hausnarketa egingo dute ondoren.
Orereta, Hendaia, Biriatu eta Kaskarotenea ikastolek antolatuta berriz, Zubiak Eraikiz ekitaldia egingo dute Agirre Lehendakariaren plazan 13:00etan. Azken eguzkilorea antzezlanak hartuko du lekukoa Orereta Ikastolaren eskutik 16:30ean, eta txikienek gozatzeko aukera izango dute 18:00etan hasita Lau Haizetara Euskaltzaleon Topagunearen barruko Aiko Maiko programak antolatutako Euskal Karaokearekin.
Xenpelar Bertso Eskolak antolatuta berriz, Xenpelar Sarien bigarren kanporaketa jokatuko da 19:00etatik aurrera Xenpelar Etxean. Ekitaldi nagusia 19:30etan helduko da. Ekitaldi xumea antolatu du euskara elkarteak: “Kantu Jirak lagunduta hainbat abesti kantatuko ditugu Herriko plazan eta ondoren irakurketa egingo dugu”.
Euskararen Egunaren harira antolatutako ekitaldiekin bat egitera deitu dituzte herritar guztiak azkenik, eta gogoan izatera, Euskarak, 365 egun dituela.
