[Galeria eta bideoa] Elkarlana, nortasuna eta hizkuntza

Elkarlana izan da gaur Errenteria-Oreretan gehien aipatu den hitza. Herrialde arte egitasmoen arte elkarlanaz aritu dira egin diren ekitaldietan, Euskararen Egunaren harira.

Urko Etxebeste Petrirena

Errenteria-Orereta

2016/12/03

Argazki jendetsua atera dute Herriko Plazan partaideek.

7BAT17 Asteak eta Orereta Ikastolaren Zubiak eraikiz egitasmoak bat egin dute gaur herrian. Bi iniziatiben harira, hainbat ekitaldi egin dituzte herrian, denak ala denak ezaugarri zehatzekin: herrialdeen arteko elkarlana, euskal nortasuna indartzea, eta euskara. Goizean Alozeko (Zuberoa) ikastolako kideek eta nazioko euskalgintzako hainbat kidek Errenteriako Udalaren harrera izan dute udaletxean. Hizketaldien txandan Julen Mendoza alkateak ongietorria egin die denei, esanaz elkarlanaren bidea ezinbestekoa dela Euskal Herriko herrialdeen artean. Hein berean, Zazpiak Bat taldeak azken urteetan egindako lana goraipatu du. Zuberoako Alozeko ikastolako kideak bereziki zoriondu ditu egiten ari diren lanagatik, eta Errenteriako Udal Txistulari Taldearen emanaldiaren ondoren, oroigarriak eman dizkie Ipar Euskal Herrikoei Xabier Iragorri 7BAT17ko kideak esan duenez, kooperazio egitasmoak aurrera ateratzea ezinbestekoa da, elkar laguntzea, gutxien duenaren alde lan egitea, baldin eta Euskal Herriko nortasuna mantendu eta hori indartu nahi bada, batez ere zailtasun gehien dauzkaten herrialdeetan, Zuberoan kasu. Horregatik, Alozeko esperientzia gogorarazi du, esanaz, elkarlanaren bidetik, han badutela ikastola. Zubiak eraikiz Orereta Ikastolak Zubiak eraikiz egitasmoan beste urrats bat egin du gaur. Lehenik, udaletxean egindako harreran parte hartu dute. Ondoren, Agirre Lehendakariaren plazan egin den ekitaldian, madalenetan jarritako tabernatik ateratako diru etekina banatzeko ekitaldia egin dute, 1.500na euro emanaz Hendaiako, Ziburuko eta Biriatuko ikastolei (Orereta Ikastolak jasoi du beste laurdena). Propio lan egin zuten 100 boluntariok jaietan Lapurdiko ikastola horien eta Errenteriakoaren alde. Ondoren, beste zubi bat eraiki dute Agirre Lehendakariaren plazan. Belfastekin (Ipar Irlanda) zuzeneko konexioa egin dute, han, Irati Oleagak, Euskararen Eguna nola ari diren ospatzen jakinarazi die pantaila eta audio bidez plazan bildu direnei. Elkarlana abiatu nahi du Oreretako Ikastolak Irlandako gaeliko eskolekin. Kantarik (beheko bideoa adibide), bertsorik eta umore onik ez da falta izan Agirre Lehendakariaren plazan. Behin ekitaldi horiek eginda, Merkatuzarren herri bazkaria egin dute 200 bat pertsonak. Arratsean, Lau Haizetara Euskaltzaleon Topagunearen eskutik, ekitaldia egingo dute Herriko Plazan, 19:00etan.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.