[Galeria eta bideoa] Karlos Ibargurenek ohorez jaso du Oarsoarrak Euskararen Saria

Oarsoarrak Euskararen Saria emateko ekitaldia atzo egin zen, Errenteria-Oreretako Xenpelar Etxean

2016/12/03

Karlos Ibarguren, atzoko beste protagonista batzuekin.

Euskararen arnasguneak, lan mundua euskalduntzeko ahaleginak, eta biak batuz, osasungintzan (langileen artean, gaixoen artean) euskarak duen tokia izan ziren atzo, Oarsoarrak Euskararen Sarien sari banaketako ekitaldian ardatzak. Garazi Ugalde Pikabeak, ekitaldiaren hasieran, hala adierazi zuen bere olerkian —ekitaldian izan zirenek lezoarra omendu zuten, atzo Lauaxeta Saria jaso zuelako Bizkaian—. Saria jaso zuen Karlos Ibarguren sendagileak ere osasun publikoan euskarak arnasguneak behar dituela nabarmendu zuen. Naroa Iturri eta Joxe Juan Ugalde kazetariek gidatu zuten gala. Bete egin zen atzo Errenteria-Oreretako Xenpelar Etxea Oarsoarrak Euskararen Sarien ekitaldi nagusirako. Protagonista nagusi bat: Karlos Ibarguren Oiartzunen bizi den errenteriarra. Osasunaren arloa eta medikuntza euskalduntzeko egiten ari den ahaleginagatik jaso du aurten saria, eta hark, ohorez, garaikurra eskuan zuela, eskertu egin zuen hura jaso izana. Baina nabarmendu zuen aitortza ez dela harentzako soilik, Ibarguren bezala edozein arlotan euskararen alde lanean dabiltzanena baizik. Bere hizketaldian, sendagileak nabarmendu zuen osasunaren alorrean profesionalik ez badago, zaila izango dela Osakidetza euskalduntzea, baina osasun erakunde osoan ez bada ere, arreta medikua euskaraz soilik jasotzeko arnasguneak badaudela eta gehiago ere izan daitezkeela, batez ere UEMAn dauden udalerriei erreferentzia eginez. Baina herritarrei ere eman zien euskalduntzearen ardura, adieraziz eurek ere egin ditzaketela eskaerak medikua nahiz mediku historia euskaldunak eta euskaraz izan daitezen, tokian tokiko anbulatorioetan egin daitezkeen eskaeren bidez. Ekitaldia Garazi Ugaldek abiatu zuen atzoko ekitaldia, poema musikatu bat irakurriz (behean, horren zati bat bideoan). Ondoren, Errenteriako alkate Julen Mendozak sarien arrazoiaren berri eman zuen, eta hark zehazki Karlos Ibargurenekin izandako esperientzia pertsonal batekin aretoan izan ziren ia 100 ikusleak hunkitu egin zituen. Oiartzungo Euskara zinegotzi Ioritz Aizpuruk euskararen normalizazioaren bidean urratsak egin behar direla adierazi zuen, erakundeetatik eta herritarretatik, eta Euskararen Egunean (gaur da, abenduak 3) bakarrik ez, egunero hizkuntza erabili eta sustatu behar dela, edonon eta edonoiz. Ordezkari politikoen artean Pasaiako Euskara zinegotzi Miriam Cabo eta Lezoko alkate Jesus Mari Martiarena ere izan ziren. Politikarien ondoren, bi interbentzio. Lehenean Iñaki Marko EHUko irakasle eta ikerlariak euskararen arnasguneak zer diren azaltzen saiatu zen. Ondoren, Mikel Urdangarin Ahize-AEK-ko hizkuntza aholkularia lan munduan euskara indartzeari buruz aritu zen, Oiartzungo Lanin egitasmoaren adibidea jarriz. Ibargurenek saria jasota, talde argazkia egin, eta 2017ko irabazlearen zain gelditu da Oarsoarrak Euskararen Saria.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.