Albaolak programazio berezia prestatu du abendurako
Astelehena izanik ere, gaur zabalik da kultur faktoria, eta bihar eta ostegunenean ere- jai egunak- zabalik egongo da.
Albaola oraindik ezagutzen ez dutenek hilabete honetan zehar aukera paregabea dute Itsas Kultur Faktoria bisitatu eta San Juanaren eraikuntzaren jarraipena zuzen zuzenean egiteko.
Gaur zabalik izango da ontziola -normalen astelehenetan itxi egiten dute-eta bihar eta ostegunean (hilak 6 eta 8) jai egun izanik ere ohiko ordutegian irekiko dutela jakinarazi dute: 10:00etatik 14:00etara eta 15:00etatik 18:00etara.
Horrez gain, Donostian egunotan ospatzen ari diren III. Sagardo Apurua jaialdian parte hartzen ari da Albaola. Asteazkenean (hilak 7), Albaolako arotzek San Juan baleontziaren pieza bat Donostiako Bulebarrean landuko dute, “trabesekin eta esku zerraz, 16.mendean bezalaxe”. 11:00etan hasiko dira lanean eta 14:00ak inguru bukatuko dutela aurreikusi dute.
Bitartean, 12:00etan, haurrentzako tailer bat egingo dute, birziklatutako materialekin ontzi bat eraikitzeko.
Gabonetan merkealdia
Gabonetan, hilaren 27,28 eta 29an eta urtarrilaren 3,4 eta 5ean publiko guztientzat tarifa bereziak izango direla iragarri dute. 6 urtetik beherakoek doan izango dute sarrera; 6-12 urte artekoek, 5 euroan; sarrera orokorrak 5 euroan, eta murriztuak 3,5ean.
Azkenik, hilaren 24ean, 25ean, 31n eta urtarrilaren 1ean ontziola itxita egongo dela ohartarazi dute.
