Gabonetako argiak jartzeko 12.000 euro bideratu ditu udalak. Herritarrei dei egin diete herriko saltokietan egin ditzatela Gabonetako erosketak.
Herriko kale gehienetan jarri dituzte koloretako argiak.
Joan den astean jarri zituzten udaleko langileek herrian Gabonetako argiak, eta gaur piztuko dituzte. Herriaren luze zabalean, Gabonetako kaleko argiak jarri dituzte, eta zuhaitzetan, kaleko egietan eta bestelako tokietan txertatu dituzte.
Udalak jakinarazi du 12.000 euroko aurrekontua izan duela Eguberrietako argiak jartzeko iniziatibak. Gainera, bi helburuz mintzatu da: batetik herriko kaleetako giroa alaitu nahi dute argiekin, eta bestetik, lehen helburuarekin lotuta, herritarrak kalera ateratzea eta herriko dendetan erosketak egitea bultzatu nahi du: “Bertako merkataritza eta ostalaritzari esker herriko kaleek bizia dute. Horregatik, bertakoa balioan jarri eta babesteko deia egiten zaie herritarrei udaletik”.