Etxeko lanetan edo zaintzan lan egiten duten pertsonen gaitasunak eta baldintzak hobetu eta Oarsoaldeko familiei zuzendutako bitartekaritza eta aholkularitza zerbitzua aurkeztu dute Oarsoaldea Garapen Agentziak eta lau udalek.
Etxeko-Lan egitasmoa gaur aurkeztu dute garapen agentziaren Errenteriako bulegoaren kanpoaldean.
Etxeko lanetan edo zaintzan lan egiten duten pertsonen gaitasunak eta baldintzak hobetzeko, Oarsoaldeko familiei zuzendutako bitartekaritza eta aholkularitza zerbitzua aurkeztu dute Oarsoaldea Garapen Agentziak eta lau udalek. Etxeko-Lan du izena.
Garazi Lopez Etxezarretak Errenteriako zinegotziak esan duenez, egitasmoaren helburua etxeko lanetan edo zaintzan lan egin nahi duten pertsonen lan poltsa bat osatzea litzateke, prestakuntza tailerrak antolatuta, eta baliabideak bilatuz eta koordinatuz beren gaitasunak hobetzen laguntzeko.
“Hainbat arrazoik eraman gaituzte egitasmoa martxan jartzera”, esan du Lopez Etxezarretak: “Eskaera geroz eta handiagoa da zaintza lanerako. Norbanakoek zein familiek eskatu digute zerbitzu hau, eta etxeko lanetan aritzeko edo zaintzarako beharra duten familiak, eta lan egin nahi duten pertsonak ditugu. Lan horietan dabiltzan pertsonen formazioa ere oinarrizkoa da. Kalitatezko zerbitzua eskaini nahi bada, baldintza duinak bermatu behar dira”.
Lan poltsa osatzearekin batera, familiei zuzendutako bitartekaritza eta aholkularitza zerbitzua eskainiko du Etxeko-Lan egitasmoak.
Horren harira, zerbitzura jo dezaketenak etxeko-lanerako edo zaintzarako pertsona bat behar duten familiak, zein lan horietan aritu nahi duten edo ari den edonor izan daitekeela esan du Oiartzungo Udaleko alkateorde Eneritz Arbelaitzek. Elkarlanerako proiektua dela gaineratu du Arbelaitzek, “Lanbidek kofinantzatzen du eta Errenteriako Udalak bultzatzen du gainontzeko udalekin elkarlanean”.
Oarsoaldea Garapen Agentziak Errenterian duen bulegoan (Olibet 6, behea) familientzat doako aholkularitza eta bitartekaritza eskainiko ditu, eta lan egin nahi duten pertsonentzat lan poltsa zerbitzua eta prestakuntza.
Horren harira, bi ikastaro eskainiko ditu: euskara ikastaroak eta prestakuntza profesionala. Jose Angel Sanchez Lezoko zinegotziak azaldu duenez, etxez etxeko laguntzaile gisa lan egiten duten profesionalek gaitasun ziurtagiria beharko dute 2017tik aurrera lan egiteko, “agiri horiek Lanbidek eskaintzen ditu”.
Bi bilera
Egitasmoaren berri emateko bi bilera deitu dituzte. Lehena, etxeko lanetan aritu nahi duten langabezian edo lanean ari diren pertsonei zuzendutakoa izango da. Hilaren 20an izango da, 18:00etan, Errenteriako Merkatuzarren. Bigarren bilera, mota horretako lanetan aritzeko pertsonak behar dituzten enplegatzaileei begira egingo dute. Hilaren 22an izango da hori, 18:00etan hasita, Merkatuzarren ere.
Etxeko-Lan egitasmoan parte hartzeko Orasoaldeko Olibeteko bulegoetara jo behar dute interesdunek, astelehenetik ostiralera, 08:00etatik 14:30era, 943 51 02 00 telefono zenbakira deitu edo
posta elektronikora mezua bidali.
