30.ena ere prest dute
Errenteria-Oreretako San Tomas azokak 30 urte beteko ditu, eta AEK elkarteari aipamen berezia egingo diote urteurren berezi honetan.
Datorren asteazkeneko San Tomas eguna berezia izango da Errenteria-Oreretan. Aurten 30 urte beteko ditu azokak, eta urteurren berezi horretan elkarte bati hainbat urtez egin duen lana aitortu eta eskertuko diote: Xenpelar AEK-ri. Izan ere, 24 urtez euskaltegia izan da San Tomas azoka antolatu duena, 2010.en urtean batzorde batek lan hori hartu zuen arte. Edonola ere, batzorde horretan dago AEK bera ere, herriko beste hemeretzi eragilerekin eta udalarekin batera.
Zentzu horretan, aurtengo txerriak euskaltegiaren izena eramango du, AEKtxo. Txo atzizkia eraman arren, txerritzarra izango da, eta urtero moduan, porra egingo dute aberearen pisua asmatzeko. Jantzi ederrena, baserritar postu dotoreena eta postuetako txistorra xamurrena ere sarituko dituzte.
Aurretik egin ez diren bi ekitaldi izango dira San Tomas azokan: batetik, irrintzi lehiaketa, eta, bestetik, Errenteria Musikaleko ikasleen dantza emanaldia.
Bi gune nagusi izango ditu azokak. Zumardiari dagokionez, bertan ikusi ahal izango dira baserritarren postuak eta animalia nahiz barazki erakusketak. Foru plazan, berriz, bertsolariak, txapel jaurtiketa eta irrintzi lehiaketa izango dira. Hirugarren gune bat ere izango da, Xenpelar Etxea. Bertan, Euskal jantzien erakusketa izango da goiz nahiz arratsaldez.
Antolatzaileek bi deialdi egin dituzte: batetik, edalontzi berrerabilgarriak erabiltzea, eta, bestetik, baserritar jantzia soinean eramatean. Errenteria-Orereta eta inguruko herrietako bizilagun guztiak gonbidatu dituzte azoka bisitatzera.
Egitaraua
- 11:00: Azokaren irekiera (Zumardia)
- 11:30: Pregoia (Zumardia)
- 12:00: Haur jolasak (Lehendakari Agirre plaza)
- 12:30: Udal txistulariak
- 13:00: Bertsolariak (Foru Plaza)
- 15:00: Herri kirolak (Lehendakari Agirre plaza)
- 16:30: Pasai Txaranga (kaleetan zehar San Tomas Lagun diren tabernetatik)
- 17:00: Txapel jaurtiketa lehiaketa eta Irrintzi txapelketa (Foru Plaza)
- 17:30: San Tomas eguneko dantzaldia (Xabier Olaskoaga plaza)
- 18:30: Trikitilariak
- 18:30: Jauziak (Zumardia)
- 20:30: Sari banaketak: txerriaren pisuaren porraren emaitza, jantzi ederrenaren saria eta postuetako txistorra xamurrenaren saria
Errenteria-Oreretako San Tomas azokaren aurkezpena, Zumardian.
