EH Bilduk osoko zuzenketa aurkeztuko du, baita 24 zuzenketa partzial ere; Pasaiak Ahal Du-k ez du oraingoz publiko egin bere jarrera zein izango den.
Oposizioaren babesik gabe ere, aurrera atera dezakete proposamena.
Gaur egingo dute Donibanen 2017rako aurrekontuei hasierako onarpena emateko udalbatzarra. 19:00etan hasiko da bilkura, Arizabalon.
Proposamena aurrera aterako dela pentsatzekoa da, gobernuak gehiengoa duenez ez duelako oposizioaren babesik behar. EH Bilduk
osoko zuzenketa iragarri du, eta horrez gain, zatikako 24 zuzenketa defendatuko ditu (behean erantsita). Pasaiak Ahal Du-k ez du oraingoz publiko egin zein izango den bere jarrera.
Gobernuak azaldu duenez, proposamena lantzeko 2016an izandako diru sarreretatik abiatu dira eta antzekoak aurreikusi dituzte datorren urterako. “Gobernu honen ahalegin nagusia izango da gastuaren kudeaketa hobetzea, eta beste erakunde batzuetan laguntza bilatzea, hala nola, aldundian eta Eusko Jaurlaritzan”, iragarri dute.
Horrez gain, 2017ko aurrekontuan aurreikusitako inbertsioen berri eman dute. Ondokoak dira: Udaltzaingoarentzako autoa, kale-garbitzeko makina, Antxoko Kultur Etxean oztopo arkitektonikoak kentzea, San Pedroko Udal Aretoan zoladura aldatzea, Arrokaundieta eta inguruak, San Pedroko kultur etxea egokitzea, Udaltzaingoarentzako radarra, Udaltzaingoarentzako garabia, eta Antxoko Esnabide-ko depositua.
Oposizioa parez pare
Inbertsioen atala da, hain zuzen ere, oposizioko EH Bildu koalizioari aurrekontu proiektuan “bereziki lotsagarria” iruditu zaion atala. “Prentsan biziberritzeari buruzko ‘publierreportaje’ panpoxak irentsi behar izaten ditugu astero astero. Hitz hutsalak”, salatu dute, eta udal gobernuak inbertsioetarako “0 euro” aurreikusi dituela salatu dute.
Besteak beste, euskararen atalean, liburutegietarako aurreikuspenetan, edota hezkuntza publikoaren sustapenerako partidak handitzea proposatuko du koalizio abertzaleak, eta hori egin ahal izateko murrizketak, besteren artean, goi karguen oinarrizko ordainsarietan edo eta asistentzia dietetan.
EH Bilduren proposamena, zenbakitan
EH Bilduren zatikako zuzenketak
