Arpa doinuak eta balleta Madalena Ermitan

Hamar arpa jotzaile eta dantza taldea arituko dira ostiralean ermitan.

2016/12/20

Miguel Iraeta, Sebas Irastorza, ane Artetxe eta Jose Luis Insausti gaurko agerraldian.

Sasoiko azken kontzertua antolatu du ostiralerako Maria Magdalenaren Lagunak Kultur Elkarteak, eta amaiera berezia eman nahi izan dio urteari. Horri begira arpa kontzertua eta balleta uztartzen dituen emanaldia egingo dute 19:00etatik aurrera ermitan bertan. Kontzertu handietan ez bada ez dela ohikoa ikustea arpa esan du Jose Luis Insausti elkarteko kideak, baina ostiralean, arpa bat ez, hamar izango dira ermita doinuz betetzen, Ane Artetxe arpa jotzailearen zuzendaritzapean. Harp&Co. arpa orkestrarekin batera arituko dira kolaborazio berezia egiten Anaiak Dantza Estudioko kideak. Hamar arpa biltzeko espazio bat izatea “luxua” dela esan du Artetxek, “ez delako erraza azpiegitura aldetik halako aukerak izatea”. Sei urterekin hasi zen arpa jotzen, eta beste herrialdeetan arpa orkestrak badaude ere Euskal Herrian ez dela halakorik esan du. Hainbat arpa elkartu eta orkestra sortzea otu zitzaion, “profesionalak diren ikasleekin biltzen hasi ginen”. Horren emaitza ostiralean erakutsiko dute, urtean ematen dituzten hiru kontzertuetatik bat ermitak hartuko duelako. Ilusio handiarekin prestatzen ari direlaostiraleko emanaldia gaineratu du arpa jotzaileak, “eta espero dut jendearen gustukoa izango dela eta aurreikuspenak beteko ditugula”. Doakoa izango da kontzertua, orain arte antolatutako besteak bezala, baina Gabonak direla eta, zozketa egingo dute kontzertua amaitu bezain pronto. “Txartelak salgai izango dira bi euroan eta saskia zozkatuko dugu kontzertuan bertan”, azaldu du Insaustik. Eskerrak eman dizkio gainera, hurbilean duten jendeari, emanaldietara joaten direnei, udalaren hirigintza eta kultura sailei eta baita Salguk enpresari ere, “azken horri esker egingo dugu zozketa”. Sentimenduz eta ilusioz prestatu dutela ostiraleko emanaldia azaldu du azkenik, eta herritar guztiak animatu ditu bertaratzera: “Espero dugu basilika lepo izango dela”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.