Zabalik da Igantziko aparkaleku berria

Igantziko aparkaleku berriak 39 plaza ditu, horietako bi, elbarrientzat.

2017/02/03

Gaur zabaldu dute Igantziko aparkaleku berria.

Igantzi Auzo Elkartearen urteetako eskaera egi bihurtu da: Gaur zabaldu dute auzo horretan udalak egin duen aparkaleku berria. Aparkalekuak 39 autorentzat du lekua, eta horietatik bi plaza elbarrituentzat dira. Aparkalekuak, auzo elkartearen urteetako eskaerari erantzun diola esan du Julen Mendoza alkateak: “Auzo honetan aparkamendu arazoa lehentasuna da eta horrela jakinarazi digute auzo batzarretan bizilagunek. Aparkaleku berriarekin, arnasa emango diogu auzoari, eta lehentasuna zenari erantzun diogu”. Alkatearen ildo beretik mintzatu dira auzo elkartearen lehendakari Julian Gabino eta lehendakari orde Carmelo Estevez. “Urteak daramagu aparkalekuaren arazoa mahai gainean jartzen, eta azkenean erantzuna jaso dugu. Auzotarrak oso pozik daude emaitzarekin eta uste dugu bertan sortu diren aparkalekuek dugun arazoari erantzuteko balioko dutela”. 105.627 euroko inbertsioa egin du udalak ur depositua zenean lanak egiteko. Oinezkoen eta ibilgailuen segurtasuna bermatzeko hainbat neurri hartu dituztela esan du Mendozak, “aparkalekuaren sarbideko arrapalaren kanpoaldean segurtasun hesi bat, ibilgailuen gurpilentzako topeak, sarreran asfalto inpresoa erabili dute zorua irristakorra izatea ekiditeko eta arku bat jarri da sarreran 2,10 metro baino altuera handiagoko ibilgailuak ez sartzeko. Izan ere aparkalekua ibilgailu txikientzat da”. Kontsumo txikiko LED motako bost farola ere jarri dituzte aparkalekuan.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.