Gizarte Segurantza sistema propioa eskatu du Duintasunak

Pentsio duinak aldarrikatu dituzte gaurko mobilizazioan, eta gogora ekarri dute Europako Karta Sozialaren arabera, gutxieneko pentsioa 1.080 eurokoa beharko lukeela izan.

Ikerne Zarate Gartziarena

Errenteria-Orereta

2017/02/06

Duintasuna kalera atera da, berriz ere.

Berriz ere kalera atera da Duintasuna. Ez ditu euriak kikildu bildu diren hamarnaka eta hamarnaka jubilatu eta pentsiodunak, eta Herriko Plazan elkarretaratzea eginda, manifestazioan abiatu dira. Pentsio duinak aldarrikatu dituzte gaurko mobilizazioan, eta gogora ekarri dute Europako Karta Sozialaren arabera, gutxieneko pentsioa 1.080 eurokoa beharko lukeela izan, “diru sarrera hori izan ezean, arriskuan egon daitekeelako duintasunez bizitzeko eskubidea”. Jubilatu eta pentsiodunen artean ere prekarietatea gora egiten ari dela salatu dute. Izan ere,2011. urtetik aurrera pentsioak ia erabat izoztuta dituzte eta horrek eros ahalmena %7a murriztu duela esan dute: “Hori horrela milaka pentsiodunek hilero osatu egin behar dute bere pentsioa diru osagarri batekin hilaren amaierara heltzeko”. Egoera hori bizi duten gehienak emakumeak direla nabarmendu dute, “prekarietatearen aurpegia, bereziki, emakumearena dela erakusten du horrek”. Espainiako Gobernuak gaurko pentsioak erasotzen dituela esan dute, baina baita etorkizunekoak ere, “%0,25eko igoera ezarriko digute pentsioetan KPIa %1,75 igo den bitartean”. Sendagaiengatik ordaindu beharreko kopurua igotzea ere leporatu diote Espainiako Gobernuari. “Hori gutxi balitz–erantsi dute–EAJ eta PSE-EEk osatzen duten gobernua ez dago prest Diru Sarreren Bermerako Errentari gutxieneko batezbesteko soldataren igoera, %8koa, ezartzera. Ez al dira pertsonak beraien lehentasuna?”. Ezberdintasun sozialak zuzentzeko bidea zein den argi dute: Babes eta Gizarte Segurantza Sistema propioa sortzea.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.