1708. urtera arteko osoko bilkuren erabakiak digitalizatu ditu udalak

1495 eta 1708 urteen arteko aurreneko 27 liburu eta 5.500 fitxa deskribatzaile dira digitalizatu dituztenak.

2017/02/07

XV eta XVIII mende arteko akta liburuak digitalizatu dituzte.

Hiru urteko lanaren ostean, Errenteriako Udal Agiritegiak XV. mende amaieratik XVIII. mende hasiera arte hiribilduaren osoko bilkuren erabakiak digitalizatu eta eskuragarri jarri ditu. Horien hedapena sustatzea eta aldi berean dokumentu baliotsuenen segurtasun kopia sortzea du helburu proiektuak, baina baita Osoko Bilkuren akten liburuak digitalizatu eta hustea. Izan ere, Errenteriako Udal Agiritegian gordetzen den dokumentu sail garrantzitsu eta aberatsenetakoa dela esan du Garazi Lopez Etxezarretak, Artxibo eta Argitalpenak saileko ordezkari politikoak. 1495 eta 1708 urteen arteko aurreneko 27 liburu eta 5.500 fitxa deskribatzaile dira digitalizatu dituztenak, eta horrenbestez, eskuragarri jarri dituztenak ikertzaileentzat eta herritarrek balia ditzaten. Liburu eta dokumentuetan aurkikuntza ugari egin dituztela gaineratu du Iago Irixoa Cortesek Ereiten enpresako kideak: ” 1520-1549 eta 1572-1576 urte arteko udal ondasunak alokatzeari eta saltzeari buruzko datuak daude tartean. Horiek lagunduko dute dokumentu hutsunea gutxitzen udal kontuen aurreneko 21 liburuak 1526-1762 urte artekoak desagertu baitziren”. Errenteriaren toponimiari buruzko azterlana osatzeko ere balio izan dute dokumentu eta akta horiek. Ezagutze ez ziren zortzi toponimo aurkitu dira: Altzibiakoa, etxea (1707); Arizchipi (1694); Botonguileetacoa, etxea (1696); Fatorenea (1698); Irurueta, mendia (1696); Martitzakoa (1708); Montesenea (1697); eta Trinidad, etxea (1700). Momentuz artxiboan kontsultatu ahalko dira liburu eta dokumentu horiek guztiak, baina urtea amaitu aurretik sarean jartzea da helburua Lopez Etxezarretak esan duenez. Lopez Etxezarretak herritar guztiak gonbidatu ditu agiritegira joatera “dokumentuak ikusi eta usaintzera”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.