Euskaraz, jolastuz

Pasaiako udal ludoteketan hilaren 28ra arteko epea dago izena emateko; 4 eta 12 urte bitarteko haurrentzako eskaintza da.

olatz mitxelena

Pasaia

2017/02/08

Haurrak, mozorroturik eta jolasean, San Pedroko ludotekan.

Pasaiako hiru udal ludoteketan izena eman nahi dutenek hilaren 28ra arteko epea dute inskripzioak gauzatzeko. Zerbitzua 4-12 urte arteko haurrei zuzendua dago, Udalaren Gazteria Departamentuaren menpe dago eta Kantauri Ludiko Elkarteak kudeatzen du. Pasaian oso harrera ona duen zerbitzua da. 260 haur baino gehiago gozatzen ari dira ludotekaz arratsaldero arratsaldero. Modu sortzailean garatzeko, lagun berriak egiteko, irudimena estimulatzeko eta, partekatuz, jokoez arduratzeko aukera ematen duten espazioak dira, beti ere eskolatik kanpo euskararen erabilera indartuz. Ludotekak ekainera arte izango dira zabalik, astelehenetik ostiralera, 17:00etatik 20:00era, eta larunbatetan 11:00etatik 13:00etara. Izena ematen duten haurrek ez dute zertan egunero joan beharrik. Asistentzia librea da, guraso eta haurren nahiaren eta beharren araberakoa. Ikasturte erdiaren kuotak 28,10 euro balio du, eta zenbatekoa eskaera formalizatzen den une berean ordaindu behar da. Era berean, instalazioak ezagutu nahi dituzten interesdun guztiek, helduek zein haurrek, ludoteketan har dezakete hitzordua, lokalak ezagutzeko. Matrikula zuzenean egingo da: – Trintxerpe-San Pedroko ludotekan: Espinosa de los Monteros plazan (Tel.: 943 392 510) – Donibaneko Ludotekan: J.J. Otaegi plazan (Tel.: 943 517290) – Antxoko Ludotekan: Azoka eraikinean (Tel.: 943 510645).

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.