Gauerdian zabalduko dute IV. Intxixu Trail lasterketan parte hartzeko izen ematea
Ekainaren 11n egingo dute Intxixu Trail mendi lasterketa. Aurten ere ibilbide luze eta motza prestatu ditu Girizia Mendi Lasterketa Taldeak.
Lau hilabete falta dira IV. Intxixu Trail egiteko. Ekainaren 11rako antolatu du Girizia Mendi Lasterketa Taldeak bidea egiten ari den lasterketa. Izena emateko aukera gauerditik aurrera izango dute bertan parte hartu nahi dutenek.
Aurtengo ekitaldian ere bi ibilbide izango dira, luzea eta motza. Motzak hamahiru euroko kostua izango du federatuentzat, eta ez direnek hiru euro gehiago ordaindu beharko dute. 200 parte hartzailerentzako tokia egongo da.
Ibilbide luzea egin nahi duten federatuek 22 euro euro ordaindu beharko dituzte (25 ez direnek). Gehienezko lasterkari kopurua 150 pertsonakoa izango da kasu honetan.
Bi kasuetan, ekainaren 8a izango da izena emateko azkeneko eguna. Egunean bertan ere eman ahal izango da izena, baina patrika gehiago estutu beharko dute orduan egiten dutenek: 20 eta 30 euro balioko du.
Izena emateko Herri Krosaren webgunean sartu beharko da.
Ibilbide luzeak 30 kilometro izango ditu, eta Oiartzungo bailara kaskoz kasko inguratzen du. Motzak, berriz, 15,5 kilometro luze du. Beheko mapak argiago zehazten ditu bi ibilbideak.
Intxixu Trail mendi lasterketaren aurtengo ibilbideak.
