Allerru irabazle Trintxerperen kontrako derbi bizi-bizian

Allerru gai izan zen markagailua iraultzeko, trintxerpetarrak jarri baitziren markagailuan aurretik lehen zatian. Etxekoek 10 jokalarirekin bukatu zuten.

Urko Etxebeste Petrirena

Lezo,Pasaia

2017/02/13

Patxi Mendizabal, Allerruko atezaina.

Oarsoaldeko derbi latza jokatu zuten larunbatean Trintxerpek eta Allerruk, Trintxerren. Erregional Preferenteko bigarrena (lezoarrak) eta hirugarrenak (trintxerpetarrak) neurtu ziren: txanpona, Allerruren alde atera zen. 1-2 irabazi zuten. Hiru adarreko garaipena: batetik, hiru puntu oso garrantzitsu lortu zituzten lezoarrek; bestetik, sailkapenean ondo-ondoan zuen Trintxerpe bost puntu atzean utzi dituzte zuri-berdeek; eta hirugarrenik, Lezoko taldeak lidergoan mantentzeko aukera bere egin zuen. Ez zen partida oso ikusgarria izan. Talde bakoitzak bere ezaugarriak jarri zituen soropilean: Trintxerpek presio handia eta intentsitatea; Allerruk baloiaren jabetza nahia eta joko teknikoa. Baina biek osagai horiek jarrita, jokoaren itxura ez zen izan ezaugarri batekoa edo bestekoa. Joko nahasia izan zen nagusi, eta horretatik etekina atera zuena, Allerru. Hala ere, etxekoak jarri ziren aurretik markagailuan lehen zatian, 1-0, Iban Garciaren golari esker. Partida orekatu joan zen lehen zatian, baina etekina etxekoek atera zuten. Bigarren zatian, aldiz, lezoarrek hartu zuten partidaren gidaritza, eta 65. minutuan (Aritz Alfonsok) eta 70. minutuan (Ibai Pagadizabalek, korner baten ondoren) sartutako golei esker, 1-2koa igo zen markagailura. Handik aurrera Trintxerpe ekin eta ekin ibili zen berdinketaren bila, baina ezin. Gainera, lehiaren azken zatian tentsio uneak izan ziren, hainbat sarrera zatar izan zirelako. Horren ondorioz, Trintxerpe hamar jokalarirekin gelditu zen. Orain sailkapenean, Allerruk lidergoa konpartitzen jarraitzen du 45 punturekin Añorga taldearekin batera. Trintxerpe hirugarrena da 40 punturekin. Goragoko mailara, Ohorezko Erregional Mailara, sailkapeneko lehena igotzen da zuzenean bakarrik. Bigarren postuan gelditzen denak kanporaketa jokatu beharko du mailaz igotzeko, hain zuzen Erregional Preferenteko beste taldeko bigarrenaren kontra. Hirugarrenak ez du inolako saririk.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.