Igandean egingo dute Lezo-Jaizkibel mendi lasterketa. Laugarren aldia du, baina beste hiruretan gertatu bezala, hasi aurretik lortu du arrakasta aurtengoak ere.
Arozena, Intxaurrandieta eta Lasaga gaurko agerraldian.
Igandean egingo dute Lezo-Jaizkibel mendi lasterketa. Laugarren aldia du, baina beste hiruretan gertatu bezala, hasi aurretik lortu du arrakasta aurtengoak ere. Hamahiru ordu baino ez zituzten behar izan 350 dortsalak agortzeko. Lasterketaren nondik norakoak azaltzeko agerraldia egin dute antolatzailea den Lezotarrak Lasterkari Taldeko Ibon Intxaurrandieta eta Xabier Lasagak gaur. Lasterketak izen handiko korrikalariak izango ditu aurten ere Jaizkibelen gora, emakumeetan Uxune Tena, Araitz Lizarazu eta Lurdes Oiartzabal lezoarra, eta gizonetan aurreko hiru edizioetan irabazle izan den Iker Oliveri, Joxe Amunarriz, Jon Ugalde, Ander Iñarra eta Raul Artola.
Lasterketak 14 kilometro eta 200 metroko ibilbidea izango du. 1.200 metroko desnibel metatua dauka, puntu baxuenak 18 metro dauzka eta altuenak, berriz, 543 metro. Lasterketaren zatirik gogorrena hasierako 7 kilometroko igoera dela esan du Lasagak. Ibilbidea bezala, anoa postuak ere mantendu dituzte antolatzaileek aurten, Intxaurrandietak zehaztu duenez: “Lau anoa postu izango dira guztira korrikalarien zerbitzura, 3 edari postu eta edari-janari postu bat”.
Lasterketa 10:00etan hasiko da Gurutze Santuaren plazatik, eta ordu eta erdi aurretik hasiko dira puntu horretan bertan dortsalak banatzen. 12:00etan egingo dute sari banaketa.
Gazteentzako 7 kilometroko ibilbidea
Lezotarrak Lasterkari Taldeak bigarrenez antolatu du gazteentzako (15-18 urte) lasterketa. Zazpi kilometrokoa izango dute ibilbidea azken horiek, eta momentuz hamar lagunek eman dute izena. “Gazteengan mendi lasterketen inguruko zaletasuna bultzatzea da helburua”, azaldu du Lasagak. Haurrek ere izango dute lasterketa egiteko aukera. 10:15ean izango da hori herriko plazan. Parte hartzeko euro bateko dortsal solidarioak izango dira eskura, 09:30etik 10:00etara. Bost mailatan sailkatuta egingo dituzte haurren lasterketak: 0-2 urte bitarte; 3-5 urte; 6-8 urte; 9-12 urte; eta 12-15 urte.
Omendua ere izango da aurtengo lasterketan: Lierni Lekuona txirrindulari lezoar gaztea.
Euro solidarioa
Lasterketarako izena ematen dutenen inskripzioaren euro bat solidarioa izango da. Zaporeak elkarteari bideratuko diote. Gaurko agerraldian parte hartu du iniziatiba horren kide Mikel Arozenak. Azaldu duenez, jasotakoa Kios uhartera eramango dute, bertan da Zaporeak elkartearen sukaldea, oraindik han diren 1.500 errefuxiatuei jaten ematen. Euro bakarrarekin bandeja osatzeko aukera eskaintzen diela azaldu du Arozenak, eta eskerrak eman dizkie Lezotarrak Lasterkari Taldeko kideei laguntzagatik, eta errefuxiatuen gaia “presente izaten laguntzeagatik”.
Antolatzaileek ere erakutsi dute esker ona, “boluntario ugari ditugu lanean lasterketa posible egiteko, eta aurten ere hala izan da. Eskerrak eman nahi dizkiegu, beraiek gabe ziurrenik ez litzatekeelako posible halako zer edo zer egitea”.
HITZA-k erreportaje zabala argitaratuko du Lezo-Jaizkibel lasterketaren gainean ostiraleko papereko alean.
