Pobrezia energetikoaren aurka GOTek egingo duen elkarretaratzearekin bat egin du EH Bilduk. Bestalde, Mikel Oterorekin hitzaldia antolatu du hilaren 24rako.
Energia berriztagarrietan oinarritutako sistema energetikoa eraikitzea da bidea EH Bilduren iritziz.
Pobrezia energetikoarekin amaitzeko, eredu eraldaketa bultzatzea dela bidea esan du Errenteria-Oreretako EH Bilduk. Horren harira,
GOT Grupo Oarso Taldeak bihar 19:30ean egingo duen elkarretaratze zaratatsu eta itzalaldiarekin bat egingo duela esan du, eta herritar eta eragile guztiak deitu ditu parte hartzera. Herrien bideragarritasunerako zein herritarren bizi duintasunaren mantenurako ezinbesteko elementu bihurtu da energia EH Bilduren ustez, egungo eredu energetikoa, ordea, “zaharkitua” dago eta “suntsitzailea” da koalizio subiranistaren iritziz, “horren menpe preso bizi gara. Egun oligopolio energetikoko multinazionalek beren onurarako erabili eta mugarik ez duen ustiaketaren bidez, energia negozio bilakatu dute”. Gehiengoaren pobretzeaz baliatzea leporatu die energia arloko enpresei, “energia herritarron eskubide eta ondarea izan ordez, euren aberastasuna handitzeko arma gisa erabiliz”.
Horren adibide, CSN Segurtasun Nuklearreko Kontseiluak Garoñako zentral nuklearra berriz zabaltzeko hartutako erabakia jarri du, “jendartearen osasuna eta segurtasuna bazterrean utzi eta urteetan zehar gehiengo politiko eta sozialaren aurkakotasunari muzin eginaz, etekin ekonomiko eta espekulatiboen mesedetan. Egungo eredu energetikoa ez da bideragarria EH Bilduren hitzetan, eta bidea, energia berriztagarrietara jauzi egitea dela gaineratu du: “Ingurumen ikuspegitik, zein bideragarritasun ekonomiko eta sozialetik, energia berriztagarrietan oinarritutako sistema energetikoa eraiki behar dugu, betiere kontsumoa murriztuta”.
Proposamen argia egin du: “Kontsumo murrizketa eta berriztagarrien aldeko apustua. Azken horrek, ekoizpen eta banaketa deszentralizatua behar du bere arrakastarako”. Autokontsumoa sustatuko duten praktika burujabeak ere beharrezko direla esan du, “eskala txiki-ertainean produzitutako energia, hain zuzen. Hau guztia helburu jakin batekin, burujabetza energetikoa eskuratzea, inoren eta ezeren menpe egon ez gaitezen”. Horretarako bidea eredu propioa dela gaineratu du, oinarri eta balio berrietan eraikia, herritarrak eraldaketaren pieza zentral bihurtuta, eta tresna politiko eta sozialak horren mesedera jarrita.
Alternatiba errealak mintzagai
Bestalde, eredu energetikoaren inguruan gogoeta egin eta Euskal Herrian dauden alternatiba errealez mintzatzeko hilaren 24an, ostiralarekin, hitzaldia antolatu du 18:00etatik aurrera Bilgunean EH Bilduko legebiltzarkidea eta frackingaren aurkako aktibista den Mikel Oterorekin.
