[Bideoa eta argazkiak] Ihoteetan murgildu da Oiartzun

Goiz goizetik hasi dute festa auzo guztietan kuestazioarekin herritarrek poxpolin eta zuriz jantzita.

2017/02/18

Kuestazioa Altzibarren. 09:30etan abiatu dira atariz atari ibiltzeko.

Intxixu eta sorginak atzo heldu ziren herrira eta Ihoteak beraiekin batera hasi ziren. Gaua luzatuko zuen bateren batek, baina hala ere, goiz jaiki dira oiartzuarrak. Izan ere goiz goizetik hasi dute festa auzo guztietan kuestazioarekin herritarrek poxpolin eta zuriz jantzita. Batzuk lehenago, besteak beranduago eta musika lagun, trikitia, dultzaina, baita biolina ere, atariz atari ibili dira puskak biltzen. Musika, dantzara eta giro onari, eguraldi paregabea batu zaio. Baserrietako balkoietatik adi jarraitu dituzte musika eta dantzak. Ondoren saria. Balkoietatik bertatik bizilagunek botatakoak biltzeko arin ibili dira, izararekin batzuetan, besteetan saskiarekin. 09:30etan abiatu dira kuestazioa egiteko Altzibar auzoko bizilagunak. Ordubete beranduago egin dute zita Iturriotzen. (Argazki galerian bi auzo horietako eta Ergoiengo argazkiak) Atseden hartuko dute orain, aldapan gora eta behera, atariz atari ibili ostean. Auzo elkarteetan mahaiaren bueltan bilduko dira 14:30ak aldera. Indarrak eta atseden hartuta, arratsaldean bilduko dira zortzi auzoetan kuestazioan ibilitako lagun guztiak, Doneztebe Plazan. 18:00etan izango da hori, eta ordubete beranduago poteoa hasiko dute Eonian Elektrotxarangak lagunduta. Intxixu eta sorginei agur Bihar ere izango da non gozatu. Txistulariek esnatuko dituzte bazterrak, eta 11:00etan Karroxa eta kalejira abiatuko dira Beheko Plazatik. Intxixu eta sorginek bihar esango diete agur Ihoteei eta oiartzuarrei, mendira itzuliko baitira. Aurretik agurra egingo diete 19:00etan plazan bertan. Otsailak 18, larunbata

09:00etan: Kuestazioa, herriko zortzi auzoetan, poxpolinez jantzita.
14:30 inguruan: Bazkariak, auzoko elkarteetan.
18:00etan: Auzoetan ibilitako kuadrillak plazan elkartuko dira.
19:00etan: Eonian elektrotxarangarekin poteoa tabernaz taberna.

Otsailak 19, igandea

09:00etan: Diana, txistulariekin.
11:00etan: Karroxa eta kalejira, Beheko Plazatik.
19:00etan: Intxixu eta sorginei agurra, eta suzko akerra.

Kuestazioa egin dute Oiartzungo auzoetan

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.