Horietan, Espainiako Estatuko eta Euskal Herriko 60 teknikari bildu dira. Errenteriako Udalak eta Teknalia enpresak antolatu dute jardunaldia,
Hirigune Historikoa biziberritzeko jardunaldietan 60 teknikari bildu dira.
Hirigune historikoa biziberritzeko jardunaldiak hasi dituzte Errenteria-Oreretako Xenpelar Etxean. Horietan, Espainiako Estatuko eta Euskal Herriko 60 teknikari bildu dira. Errenteriako Udalak eta Teknalia enpresak antolatu dute jardunaldia, eta besteak beste, arazoak identifikatu eta horiei aurre egiteko bideak antzemango dituzte, baita kudeaketa ereduak ere, eta finantziazio era berriak eta kudeaketa ereduak ere aztertuko dituzte jardunaldian.
Julen Mendoza alkateak zabaldu ditu jardunaldi horiek gaur goizean. 2012ko plan estrategikoa osatzeko garaian hirigunea biziberritzeari garrantzia berezia eman ziotela esan du Mendozak: “Erdi arokoa da alde zaharra, ondoren industrializazio prozesua bizi zuen herriak eta Manchester Txikia deitu zuten ondorioz. 1950. urtean 16.000 biztanle zituen gure herriak, eta 1975ean 46.000 biztanle, fabrika ugari zabaldu zituzten bertan. Industria hori desagertu eta hirigune historikoan inbertsio asko egin badira ere, uste dugu oraindik ere azken horren biziberritzearekin zor publikoa dugula”.
Indarguneak dituela hirigune historikoak esan du: “gure herriaren bihotza izaten jarraitzen du, bizitza alde zaharrean ematen da, bihotza eta bizitza dagoen tokian komertzioa dago”.
Hirigintza arloan urteetan zehar alde zaharrean egin diren inbertsioetako batzuei aipamena egin die, bestalde. Torrekua aipatu du, eta bertan udalaren apustu den sormen gunea kokatu dutela nabarmendu du. Kapitain Etxeari, Errenteria-Oreretako beste eraikin historikoetako bati ere egin dio erreferentzia, “berritzen amaitu berri dugu Jantziaren Zentroa hartzeko. Gainera berritze lanetan erdi aroko labea aurkitu zuten bertan”. Hirigune historikoan komertzio berriak zabaltzeko laguntzak ematen ari dela udala nabarmendu du bestalde Mendozak. Emakumeen etxea da beste apustua, “gune historikoan kokatuko dena”
Errenteria-Oreretaren Hirigune Historikoa biziberritzeko bulegoa epe laburrean zabalduko du udalak, eraginkortasun energetikoa eta irisgarritasunaren arloak landuko dituena. Bulego hori, Oarsoaldea Garapen Agentziarekin elkarlanean jarriko du martxan. Errenteriak, Erdi Aroko trama duen hirigune aberatsa duela nabarmendu du udalak, “horri balioa eman nahi dio udalak. Zeharkako gaiak ere landu nahi dira, erdialdearen garrantzi urbanistikoa, ekonomikoa eta soziala, betiere garapen iraunkorra bermatuta”.
Bereziki hirigune historikoak aztertuko badituzte ere, auzo historiko ezberdinak eta horien birgaitze energetikoa ere jarriko dute mahai gainean gaurko jardunaldiaren barruan.
Halako jardunaldiak egitea garrantzitsua dela esan du azkenik, eta parte hartzaile guztiei eskerrak eman dizkie, “ikastea garrantzitsua delako une honetan, dena eraikitzeko dugunean. anbizio handiko lana dugu aurretik, urte batzuk eskatuko dituena”.
