Aitzol Gogorzaren egoera larria salatzeko agerraldia egingo dute

EH Bilduk bat egin du Sarek deitutako agerraldiarekin eta senideei elkartasuna adierazita, Gogorza etxeratzeko lanketan bidelagun izango dituztela esan du.

Ikerne Zarate

Errenteria-Orereta

2017/02/22

Aitzol Gogorzaren egoera salatzeko elkarretaratzea.

Aitzol Gogorzaren egoera salatzeko elkarretaratze bat.

Aitzol Gogorza euskal preso oreretarrak bizi duen egoera larria salatzeko agerraldia egingo du Errenteria-Oreretako Sare Herritarrak. Larunbatean deitu du, 11:30ean, Herriko Plazan. Gogorzak gose greba hasi zuen hilaren 16an, eta pasa den astelehenean utzi zuen. Gose greba, 100.2 artikulua aplikatzeko eskatzeko egin du oreretarrak. Deialdi horrekin bat egin du Errenteria-Oreretako EH Bilduk, eta Gogorzak bizi duen egoera larria salatu du. Espetxeak Gogorzaren osasun egoeran eragiten duela esan du koalizio subiranistak, “atzera bueltarik ez duen muturreko egoeretara eramateraino”. Egoera egunez egun okertzen ari dela gaineratu du, “horren aurrean ezin dugu Aitzol [Gogorza] espetxean mantentzea onartu. Giza eskubideen izenean, Aitzolen askatasuna eskatzen dugu beste behin ere, herrian eta bizirik, ahalik eta azkarren gure artean nahi dugulako”. Errenteria-Oreretako gehiengo sozial eta politikoak behin baino gehiagotan eskatu duela Gogorza etxeratzeko gogorarazi du EH Bilduk, “herri osoak bere egiten du”. Aitzolen senide eta lagunei “elkartasunik beroena” adierazi die, eta Gogorza etxeratzeko lanketan bidelagun izango dituztela jakinarazi du. Amaitzeko, Sare Herritarrak antolatu duen elkarretaratzera deitu ditu herritar guztiak eta eragile sozial, politiko eta sindikalak, “herri gisa dagokigulako eskubide urraketa hau salatzea eta Aitzol gure artera ekartzea”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.