Emakumeen Nazioarteko Eguna, emankorra Oiartzunen

Emakumeen Nazioarteko Eguna dela-eta ekitaldi asko eta interesgarriak daude iragarrita Oiartzungo Feministen Asanbladak osatu duen egitarauan.

Urko Etxebeste

Oiartzun

2017/02/25

Oiartzungo Feministen Asanbladako kideak.

Martxoaren 8aren harira, Emakumeen Nazioarteko Eguna, Oiartzungo Feministen Asanbladak udalarekin eta beste hainbat eragilerekin elkarlanean, egitasmo sorta indartsua antolatu du . Martxoaren 3an hasi, eta 24ra arte badago ekitaldi mordoa emakumeen borrokak, nahiak eta beharrak ezagutarazi, gizarteratu, eta zabaltzeko. Emakumeen Nazioarteko Eguna mamiz bete dute denen artean. Oiartzungo Feministen Asanbladako kide honako talde eta eragileak dira: Antiju Morik, HELTA, Killirikupe, Ernai, Haurtzaro Ikastola, Elizalde Herri Eskola, Oiartzungo Udala eta norbanakoak. Horiei laguntzen Oiartzungo Antzerkizale Taldea eta Abaraxka ludoteka ibiliko dira, besteak beste. Egiatarauaren barruan dauden hitzaldietarako haur zaintza zerbitzua prestatu dute. Aldez aurretik jakinarazi behar dute interesdunek euren haurrarentzat zerbitzu hori erabiliko dutela, posta elektroniko bidez. Gainera, martxoaren 11ko bazkarirako menu begetarianoa eskatzeko aukera dagoela jakinarazi dute antolatzaileek. Aurreko posta elektronikora bidali behar dira eskaerak. Hortaz, honakoa da egitarau oso-osoa. Ikus daitekeen bezala, denetik dago. Bertan emakumeen ahotsak entzun ahal izango dira, hitzaldi, tailer eta ikus-entzunezkoen bitartez.

Martxoak 3, ostirala: 18:00etan, udaletxeko areto nagusian, Araitz Rodriguez gidoigilearekin Gu, Euskaldunako emakumeak dokumentalaren emanaldia eta solasaldia.
Martxoak 5, igandea: Lilatoia.
Martxoaren 6tik 10era: Oiartzungo emakumeen lanen erakusketa Manuel Lekuona Bibliotekan. 10:00-12:00 eta 17:00-19:00 ordu tarteetan egongo da zabalik.
Martxoak 8, asteazkena: 11:00etan, udaletxean, Goiatz Labandibar eta Mirari Martiarena kazetariekin Emakumeak kazetaritzan tailerra; 17:30ean, Doneztebe Plazan, Feministak plazara! ekintza eta pintxo-topa; 18:55ean, Errenteria-Oreretako eskualdeko manifestaziora joateko autobusa hartuko dute.
Martxoak 10, ostirala: 18:00etan, udaletxean, Mari Carmen Basterretxearen Euskal Herria, kultura matrilineala liburuaren aurkezpena.
Martxoak 11, larunbata: 14:00etan, Joxixonian, emakume feministen bazkaria. Sarrerak 18 euroan eros daitezke Amazkar tabernan eta Garmendi txokolategian.
Martxoak 12, igandea: 19:00etan, udaletxean, Kitto! Nik utziko dut antzerkia. Sarrera: 5 euro.
Martxoak 17, ostirala: 18:00etan, Manuel Lekuona Bibliotekan, Mahai-ingurua: Emakumea eta hezkuntza.
Martxoak 24, ostirala: 18:00etan, udaletxean, Oihana Etxebarrietak Borroka armatua eta kartzelak liburua aurkeztuko du. Ondoren solasaldia egongo da liburuaren egilearekin eta herriko emakume preso ohiekin.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.