Eta zazpigarrena ere...

26-25 irabazi dio Aloña Mendiri Donibane Eskubaloiak.

olatz mitxelena

2017/02/27

Jokalari arrosak, larunbateko garaipena ospatzen.

Garaipen esanguratsua lortu du asteburuan Donibane Eskubaloiak. 26-25 irabazi dio Aloña Mendiri, eta garaipenarekin igoera postuen borrokarako tokia lortu. Bigarren itzulian zazpi partida jarraian egin dituzte arrosek galdu gabe, eta 22 punturekin sailkapeneko bosgarren postuan kokatu dira. Partida oso lehiatua izan zen hasieratik bukaerara arte. Oñatiarrek lortu zuten lehen zatian abantaila, baina, arrosek ederki eutsi zioten, tinko defentsan, eta Ion Escribano eta Ibai Borges piboteen eraginkortasunak lagunduta, atsedenaldira 12-13 iristeko. Bigarren zatian jokoa azkartu zuen Aloña Mendik eta hasiera batean abantaila handitzea lortu zuten arren, arrosek behar bezala erreakzionatu eta partida bukatzeko hamar minuturen faltan, lau golen abantaila zuten. Oñatiarrek, baina, ez zuten etsi eta 25na berdintzea ere lortu zuten. Azken unean, ordea, Ion Zigandaren baselina ikusgarri batek garaipenaren gola eman zien arrosei. Jokalariak eta golak: Jon Gajate (8); Ibai Borges (5), Mikel Oiarbide (4), Jose Gonzalez (3), Ion Escribano (3), Haritz Perez (2), Aritz Frias (1), Aitor Cerro, Emilio Idoipe, Jokin Batalla eta Cristian Cobeña.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.