'Marinazkane eta zirikuak' ipuina aurkeztuko dute gaur, 18:30ean hasiko den ekitaldian, Bekoerrota kiroldegian. Salgai jarriko dute argitalpena.
Zein zen Trapujale eta zirikuen bizimodua elkar ezagutu aurretik? Ipuinak hori erantzuten du. Argazkia: Lezoko Portua.
Inauteriak aurrera doaz Lezon. Gaurtik, gainera, elementu berri bat izango dute,
Marinazkane eta zirikuak ipuina. Izan ere, ipuina gaur bertan aurkeztuko dute, 18:30ean hasiko den ekitaldian, eta Korri, Xalto eta Brinko pailazoek
Trapujale ikuskizuna egin ondoren. Bekoerrota kiroldegian egingo dute hori guztia.
Mikel Susperregik eta Lander Zurutuzak sortutakoa da ipuina, hau da, 1990ean Trapujale pertsonaiari buruzko komikia sortu zuten lezoarrena. 32 orrikoa da, eta horrela, inauterien zikloa itxitzat emango dute. Trapujalek 30 urte bete ditu aurten, hori nabarmentzeko sortutakoa da ipuina, Lezoko inauteriei beste elementu bat gehitzeaz gain. Gaur bertan argitalpena eros daiteke, bost euroan, kiroldegian. Herriko pailazoen kartela jasoko dute ipuina bere egiten dutenek. Gaurtik harago, udaletxean erosi ahal izango da.
Xalto eta Brinko animazio elkarteak izan du ipuin ilustratua sortzeko ardura. Udalak bere gain hartu du horren kostua, bi erakundeen arteko hitzarmenean hala azaltzen delako.
Ipuinak zer kontatzen duen jakiteko, beraz, hura erostea besterik ez dago.
Horrez gain, Lezoko inauterietako ondorengo orduetako egitaraua honakoa da:
Gaur, Astelehenarre
- 17:00etan, mozorroen festa Karlos Saldise plazan.
- 18:30ean, Korri, Xalto eta Brinkoren Trapujale saioa. Ondoren, Marinazkane eta zirikuak ipuinaren estreinaldia.
Hilak 28, Asteartebeltz
- 15:15ean, Lezo Herri Eskolako ikasleek Trapujaleren epaiketa txikia antzeztuko dute Gurutze Santuaren plazan.
- 19:30ean, Trapujaleren epaiketa Gurutze Santuaren plazan, eta herio bidaia.
