Gaztea bazara, eta ikus-entzunezkoak gustuko badituzu...

Bideogintza tailerra antolatu du udalak, 12 eta 17 urte arteko gazteentzat, doan.

olatz mitxelena

2017/03/01

Gazteari eta Aniztasun arloa elkarlanean ari dira, gazte etorri berria, herriko gazteak ezagutu ditzaten.

Pasaiako Udaleko Migrazio eta Aniztasun Arloak eta Gazteria Departamentuak doako bideogintza tailerra antolatu dute 12 eta 17 urte bitarteko nerabeentzat. Izena ematen duten gazteek bideo bat nola egin ikasiko dute, baina erronka berezi bati jarraituta. Bideoan Trintxerpe eta San Pedron gustukoen dituzten lekuak jaso beharko dituzte: lagunekin elkartzen diren lekuak, erosketak egiten dituzten dendak, ezagutzea merezi duten lekuak… eta hori guztia, Pasaiara bizitzera etortzen diren nerabeei erakutsi beharko diete ondoren, etorri berriek haien adineko jendearekin ibiltzeko zer egin behar duten jakin dezaten. Errodajeak Trintxerpe eta San Pedroko barrutietan egingo dituzte. Tailerra larunbata goizetan izango da eta lau saio egingo dituzte; hilaren 11, 18 eta 25ean eta apirilaren 1ean, 10:30etik 14:00etara, Trintxerpe-San Pedroko Gaztelekuan, Gran Sol kaleko 11. zenbakian. Izen-ematea Ikastaroa doakoa da eta ez da materialik eraman behar; udalak ohartarazi duenez “ikasteko eta ondo pasatzeko gogoa baino ez dira behar”. Hasiera batean 12 plaza eskainiko dituzte, baina parte hartzaile gehiagok izena emanez gero, bigarren tailer bat egiteko aukera aztertuko lukete. Izena emateko Pasaiako Gazteria Departamentura jo behar da, datuak emateko eta plaza gordetzeko. Telefonoz ere eman daiteke izena, 08:00etatik 14:30era deituta 943004330 telefono zenbakira, edota posta elektronikoz. Hilaren 9ra arteko epea dago izena emateko. Jarduera gehiago Bideogintza tailerra ez da izango Pasaiara bizitzera datozen nerabeak ezagutzera eman helburuz antolatuko dute jarduera bakarra. Antxoko jaialdia eta tourra, futbol txapelketak… Jarduera guztiak gazteek proposatutakoak dira Udaleko Migrazio eta Aniztasun Arlotik Pasaiara bizitzera datozen gazteei harrera ona egiteko garatzen ari den parte hartze prozesuaren barruan.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.