Trintxerpera jauzi egin dute inauteriek
Boveda Asiaildi Taldearen 50. urteurrenak protagonismo berezia izango du aurten.
Sardinaren erreketaren kea oraindik arnas daitekeenean, inauteriek Trintxerpera egingo dute jauzi. Ostiralean hasi eta igandera bitartean girorik ez da faltako Euskadi Etorbidearen inguruan.
Urtero legez, konpartsak izango dira jaiaren ardatz. Larunbatean eta igandean irtengo dira, 16:00etatik aurrera. Lonjako obrak direla eta, Carbonesetik irtengo dira desfilek, eta Azkuenen bukatu, Euskadi etorbidera barrakak egon ohi diren toikitik igarota.
Boveda eta Korkoiburuak
Herriko bi taldek izango dute aurtengo inauterietan protagonismo bezeria: Bovedak eta Korkoiburuek. Boveda aisialdi taldeak 50 urte bete ditu, eta urteurrenari lotutako erakusketa ikusgai dago Zirizan. Gaur eta bihar bisitatu daiteke, 19:00etatik 21:00etara. Baina urteurrenaren gaiak, Bovedaren konpartsan ere izango du toki. Txotxongiloz jantzita irtengo dira dantzan, baina taldearen historia luzean atera izan dituzten mozorro denen bilduma eginez.
Jaietako berritasuna Korkoiburuek ekarriko dute aurten. Gazte taldeak bakailaoaren ehorkezta antolatzearen ardura beregain hartu du, eta mimoz ari dira prestatzen, inauteriak agurtzeko ekitaldiari aire freskoa eman nahian. Igandean 20:00etan izango da ehorzketa, urtero legez, Errenteriako Amulletako Danbor Kofradiak girotuta. Azkuenetik irten eta portura arteko bidea egingo du desfileak.
Feriak arriskuan
Inauteriak bitartean ferianteentzako gorde ohi da Lasako aparkalekua, eta aurten ere hala aurreikusia dute. Aparkaleku eskasia konpensatzeko asmoz, udalak Portu Agintaritzari herritarrentzako beste gune bat egokitu dezan eskatu dio, baina, Portuak ukatu egin dio tokia. Honenbestez, udalak erabaki du ferianteei Trintxerpen egoteko epealdia murriztea, egoteko eskatuta zauzkaten 15 egunak erdira murriztuta. Erabakiak, baina, ferianteen haserrea eragin du, eta dirudienez, batzuk epea murriztekotan ez direla etorriko adierazi diote udalari.
Bien bitartean, udalak jakinarazi du trafikoan aldaketa esanguratsuak izango direla inauteriak bitartean, eta garraio publikoaren geltokiak tokiz aldatuko dituztela.
Egitaraua 
