Hobari sistema aurrerakoia abiatu du udalak, errenta baxuenak dituzten familiak ere Errenteria Musikaleko eskolan aritzeko aukera izan dezaten.
Datorren ikasturterako Errenteria Musikalen matrikulazio kanpaina berritasunez beteta dator.
Datorren ikasturteko Errenteria Musikalen, Udal Musika eta Dantza eskolaren matrikulazio kanpaina aurkeztu du gaur Garazi Lopez Etxezarreta Errenteria Musikal Patronatuko zinegotzi arduradunak. Berritasun ugarirekin dator, datorren astelehenean (hilak 13) abiatuko duten matrikulazioa. Garrantzitsuena, ordenantza fiskaletan egindako aldaketen ondorioz joan den hileko plenoak onartu zuen
hobari sistema da: “Hobari politika garrantzitsua” jarri duela martxan udalak nabarmendu du Lopez Etxezarretak, “helburua, errenta baxuenak dituzten familiak musika eta dantza eskolara ekartzea da, eta horretarako hobari sistema aurrerakoi bat egin dugu”. Errenta ez da oztopo izango beraz, instrumentuak edo dantza ikasi nahi duten herritarrentzat, doakoa izango dutelako oinarrizko errenta edo larrialdiko laguntza jasotzen duten familiek.
Musika eta dantza eskola batean nahitaezkoak direla hainbat instrumentu nabarmendu du bestalde, eta horiek sustatzeko, instrumentu horiek ikasteko matrikulazioa doakoa izango da: “Bere momentuan gure eskolan aztertu zen zer nolako instrumentu ikasten zuen jendeak eta horrek zein aukera ematen zituen taldeetan aritzeko. Azterketa horretatik ondorioztatu genuen bazirela indartu behar ziren instrumentu batzuk”. Kontrabaxua, baxu elektrikoa, tuba eta bonbardinoa dira zehazki sustatu nahi dituzten instrumentuak, eta 18 urtetik beherako ikasleek %100eko hobaria izango dute horien ikasketarako. Hobari hori instrumentu horien ikasketen lehen hiru ikasturte akademikoetan izango dute.
Matrikulazio kanpainan ere aldaketak
Bi matrikula mota izango dira. Ikasle berriena, eta dagoeneko Errenteria Musikalen ikasle direnena. Ikasle berrien kasuan hilaren 13tik 24ra bitarte egin beharko dute plaza eskaera. Orain arte ez zen egiten, baina ezinbesteko urratsa izango da datorren ikasturtean musika eta dantza eskolan aritu nahi dutenentzat.Plaza eskaera eginda, egutegia osatuko dute Errenteria Musikalen, eta matrikula formalizatu beharko dute ikasle berriek maiatzaren 22tik ekainaren 2ra arte.
Dagoeneko ikasle direnek, berriz, orain arte ez zuten matrikulazio formalik egiten, automatikoki berritzen zen, kontrakorik jakinarazten ez bazuten. Aurten ez da hala izango, eta espresuki joan beharko dute matrikula berritzera Errenteria Musikalera. Ikasle bakoitzak orri bat jasoko du bere ordutegiarekin, eta hori jasota, maiatzaren 2tik 12ra bitartean matrikula egin beharko du. Online egiteko aukera ere izango dute, behin orria jasotzen dutenean.
