Teknikariak atzo Donibanen erre zen etxearen egoera aztertzen ari dira
Bien bitartean kaltetutako etxean bizi ziren bi familiek etxetik kanpo jarraitu beharko dute; baita ondoko eta azpiko etxeetakoak ere, segurtasunagatik.
Lehian zen batel estropada bertan behera utzi behar izan zuten, babes neurri guztiak sutearen kontrolera bideratzeko.
Atzo eguerdia piztu zen sua, eta alarma berehala zabaldu zen. Egurrezko etxeak daude inguru guztian, eta bokalearen parean, haizeteen eraginez, sugarrek etxe batetik bestera jauzi egin eta sua zabaltzeko beldurrez egon ziren bizilagun asko eta asko lehen unetan.
Tokia, gainera, ez da iristeko erreza. Larrabidetik sartu behar izan zuten suhiltzaileek, goialdetik, eta kostata. Baina, hori bai, hara iritsita, berehala menderatu zuten sua.
Kalteak, zorionez, materialak baino ez dira izan.
Sua zerk piztu zuen ez dute oraindik argitu. Badakite etxebizitzaren bigarren solairuan sortu zela, baina ez zerk eragin zuen. Etxearen teilatua erre eta behera etorri zen.
Pisua arindu
Barrutiko alkateorde Miriam Canok azaldu duenez, gaur goizean halako lanetan espezializatutako enpresa bat bertan ari da lanean, batez ere, sugarrek kaltetutako etxeari hondakinak kendu eta pisua arintzeko asmoz.
Etxebizitzaren bigarren solairua erabat kiskalita dago, eta teilatua behera etorri zenez, ura asko pilatu da. Fatxada bat ere kaltetua omen du etxeak, eta ziurrenik, bota beharko dute erori baino lehen.
Lanek, kasu honetan ere, badute bere zailtasuna, erretako etxearen kokapenarengatik kontainerrik, esaterako, ezin dutelako bertara igo.
