Erabakitzen hasi dira errenteriarrak

Hamalau bozkaleku eta hamazazpi mahai daude guztira Errenteria-Oreretan eta 33. 435 herritar daude deituak bozkatzera.

2017/03/19

Bokzalekuak zabaldu bezain pronto hasi dira bozkatzen errenteriarrak. Irudian Biteri kaleko egoitzan bozkatzen.

Ados zaude euskal errepublika burujabe bat eratzearekin? Aurreko erantzuna baiezkoa bada, ados zaude independentea izatearekin? Galdera horiek gaur Errenteria-Oreretako biztanleek erantzungo dituztenak Demoarsok deitutako herri galdeketaren barruan. 09:00etan zabaldu dituzte hauteslekuak, ordu eta erdi aurretik osatu dituzte mahaiak, eta jendea hasi da bozkatzen. Une honetan, normaltasuna da nagusi Errenterian Demoarsok gaurko galdeketarako prestatu dituen hamalau hauteslekuetan. 20:00etan itxiko dituzte azken horiek, eta hortik aurrera hasiko da kontaketa. Hamalau bozkaleku eta hamazazpi mahai daude guztira udalerrian eta 33. 435 herritar daude deituak bozkatzera. Galdeketaren emaitza baino, parte hartzea bera da gaurko galdeketaren arrakastaren giltza Demoarsoren ustez. Egunean zehar egitarau zabala prestatu dute. Herritarrak eta hautetsontziak izango dira protagonista nagusiak gaur, baina giroa ez da faltako. Zubietako talogileak eta joaldunak, Amulleta Danborraren kofradia, Alkarkide Txaranga, Ereintza Dantza Taldea, elektro txaranga, txistulariak eta trikitilariak herriko kaleetan barrena ibiliko dira egun osoan zehar. Arratsaldean, 17:00etan hasita, Modestok dantzatzeko aukera eskainiko die Zumardiko Lau Haizetara karpara hurbiltzen direnei. 18:30etan Porrotxek hartuko du oholtza, eta hogei afarien zozketa egingo dute ondoren.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.