Fatimako Andra Mariaren elizan emango dute kontzertua larunbatean 20:30etik aurrera, eta eliza bete nahi dutela esan du Mitxelenak
Mitxelena, Collar eta Aierdi gaurko aurkezpenean.
EMKE Errenteriako Musika Kultur Elkartearen Bandak kontzertua antolatu du larunbatean
Gure Bakarlariak zikloaren barruan. Emanaldiaren gaineko zehaztapenak agerraldian eman dituzte Josu Mitxelena EMKEren presidenteak, Alain Aierdi Errenteriako Musika Bandaren zuzendariak eta Jon Collar Kultura zinegotziak. Alberto Urretxo BOSeko, Bilboko Orkestra Sinfonikoko tronboi bakarlaria eta Errenteriako Musika Bandako musikariak elkarrekin arituko dira
Colors For Trombone emanaldian.
Fatimako Andra Mariaren elizan emango dute kontzertua larunbatean 20:30etik aurrera, eta eliza bete nahi dutela esan du Mitxelenak, “guretzat luxua da Urretxoren mailako musikaria izatea gurekin”. Euskal Herriko musiko klasikoen artetik etorkizun handiena duen musikaria dela Urretxo esan du Aierdik, eta “izugarria” dela berekin batera aritzeko aukera izatea, “aukera da bandarentzat eta niretzat”.
Joan den larunbatean entsegua egin zuten eta “ikaragarria” izan zela nabarmendu du EMKEren zuzendariak, “bandako musikariak Urretxo bera eta ni neu ere oso pozik gaude emaitzarekin”. Bert Appermont musikagile belgikarraren lanak aukeratu dituzte, lau guztira kontzerturako:
Gulliver´s Travels;
Absalon,
Choralia, eta emanaldiari izena eman dion
Colors for tronbone. Kontrastea bilatu dutela aukeraketa egiteko garaian azaldu du Aierdik, “kontzertua izugarri atsegina izango da entzuleentzat, eta gainera, uste dut Errenteriako Musika Banda altxor txiki bat dela ohartuko direla”.
Bide beretik mintzatu da Collar: “Moldaketarako gaitasun izugarria erakusten ari da musika banda, maila handia duela eta herritarrek izugarri gozatzen dugu beraiekin”.
Kontzerturako sarrera doakoa da eta 650 lagunentzako lekua du Andra Maria Fatimaren elizak.
Diskoaren aurkezpena
Bandarekin batera kontzertua eskainiko du Urretxok larunbat arratsaldean. Ez da ordea, Errenteria-Oreretan larunbatean egingo duen kontzertu bakarra, Soinuen bidaia diskoa argitaratu berri du eta horren gaineko errezitaldia egingo du goizean, 12:00etan hasita, musika eskolako entsegu gelan. Sarrera librea da entzutera joan nahi duen ororentzat. Tronboi, biola eta pianorako kontzertua izango da.
EMKEren bi ordezkariak eta Collarrek herritar guztiak animatu dituzte goizeko zein arratsaldeko emanaldietara hurbiltzera, “luxua delako benetan Urretxoren tamainako musikari bat izatea gure artean”.