Astelehenean zabalduko dute izena emateko epea, eta apirilaren 7ra bitarte izango dute aukera matrikula egiteko interesdunek.
Lete, Ostolaza eta Narbarte gaurko agerraldian.
Udalekuak aurkezteko agerraldia egin dute gaur goizean Itziar Ostolaza Gazteria azpisaileko zinegotziak eta Ibai Narbarte eta Julen Lete udal aisialdi zerbitzua kudeatzen duen enpresaren koordinatzaile eta begiraleak, hurrenez hurren. Aurten, aurrekoan bezala, bi kanpaldi, txikien udalekua, eta udalekuak eskainiko ditu Errenteriako Udalak. Astelehenean zabalduko dute izena emateko epea, eta apirilaren 7ra bitarte izango dute aukera matrikula egiteko interesdunek.
Kanpaldietarako plazak mugatuta daude, eta beraz, zozketa bidez osatuko dute zerrenda. Udalekuetan berriz, izena ematen duten haur guztiek izango dutela parte hartzeko aukera esan du Ostolazak. Baldintza, kanpaldietan zein udalekuetan parte hartzeko, Errenterian erroldatuta egotea. Behar bereziak dituzten haurrentzat, arreta emateko begiraleak kontratatuko dituztela gaineratu du Gazteria azpisaileko zinegotziak.
Hobariak
Familia ugariek eta seme-alaba bat baino gehiago izena ematen duten familiek hobariak izango dituzte. Izena emateko sisteman berrikuntza izango da aurten. Prozedura errazteko asmoz, inprimakia
internet bidez eskuratzeko aukera emango du udalak: “Hura inprimatu, etxean bete, diru sarrera egin eta bi agiriak Gazte Informazio Bulegora (Merkatuzar) ekarri beharko dituzte”. Bertan ere egin dezakete. Bulegoaren ordutegia 09:00etatik 14:00etara eta 16:30etik 19:00etara.
Joan den urtean 900 haur inguruk hartu zuen parte udalak udako oporrei begira antolatutako lau programetan. kanpaldiak zein udalekuak, ahalik eta “hezitzaileenak” egiten saiatzen direla esan du Ostolazak, horretarako hezitzaile talde “formatua eta oso langilea” dutela.
Txikiak udalekuan 3-5 urte arteko haurrei begirakoa da, Udalekuak, berriz, 6-12 urte arteko haur eta gaztetxoei begirakoa.