Aste honetan hasiko dira Herrera eta Trintxerpe arteko lanak

Trafikoa berrantolatuko dute lanak bitartean.

olatz mitxelena

2017/04/05

Iñigo Urkullu lehendakaria buru,erakundeetako ordezkariak, kaiko Herreran, pasarelaren egitasmoa aurkeztu zuten egunean.

Udalak jakinarazi duenez, aste honetan hasiko dira Herrerako Euskotreneko geltokia eta Trintxerpeko barrutia lotuko dituen bidea erakitzeko lanak. Oinezkoentzako eta txirrinduentzako pasabidea egiteko obren proiektua behin-betikoz onartu dutela iragarri dute, eta ondorioz, aste honetan bertan, trafiko desbideraketak atondu eta obra etxolak muntatzeari ekingo diotela aurreratu dute. Hirigintza zinegotzi Nahikari Oterminek adierazi duenez “Pasaiako badia biziberritzeko proiektuaren barruan aurrera eramango dituzten lehen obrak dira hauek”. Zehaztu duenez, proiektuak osotasunean zortzi hektarea biltzen dituela eta “badiaren eraldaketa integrala” ekarriko duela nabarmendu du zinegotzi jeltzaleak, “portuko eremuak hiri-bilbean txertatuko” dituelako, “harreman gune berriak sortuz, herritarren ongizatearen eta bizi kalitatearen mesedetan”. Segurtasuna eta irisgarritasuna Pasabide berriak herritarren segurtasuna eta irisgarritasuna hobetuko dituela adierazi du hirigintza zinegotziak, “oinezko eta auto/kamioien trafikoak banatzen dituelako” . Horrez gain, aisialdirako eremu berde berriak eraikiko dituztela nabarmendu du, eta ibilbidean zehar eserleku, zuhaitz eta argiztapen elementuak jarriko dituztela zehaztu. “Anbizio handiko” proiektua dela iritzi dio Nahikari Oterminek, “baina aldi berean errealista eta egungo testuingurura eta beharretara egokitzen den proiektua”. Gaineratu duenez, egitasmoa erakunde guztien elkarlan eta konpromisoari esker atera da aurrera. Atzerapenez Lanen hasiera atzeratu egin da, eta Oterminek EH Bilduri egotzi dio atzerapenaren ardura, esan duenez, koalizioak proiektuari aurkeztutako alegazioek eragin dutelako atzerapena. Alegazioengatik ez balitz, proiektua duela hilabete onartuta litzatekeela adierazi du Oterminek. Izan ere, EH Bildu oso kritikoa da proiektuarekin. Oso bestelako iritzia du egitasmoaz. Koalizioak ez du uste irirgarritasuna hobetuko duenik, pasarela oso malkarra dela salatu duelako, ez eta segurtasuna bermatuko duenik, EH Bilduren ustez, trafikoen deskriminazioari uko egingo zaiolako. Horiek eta beste hainbat salatu zituzten proiektuari aurkeztutako alegazioetan.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.